نشرت الإعلامية سالي عبد السلام، عبر حسابها الرسمي على موقع الصور والفيديوهات "إنستجرام"، صورة من التليفزيون المصري، لنقل فعاليات المؤتمر الثالث للشباب مع الرئيس عبد الفتاح السيسي، المنعقد في الإسماعيلية، وذلك أثناء تواجدها بالأراضي المقدسة بالسعودية بصحبة عائلتها، وعلقت على الصورة قائلة: "خلاص نلعب صحاب تانى مش هقلب بس انتوا اللى استفزتونى برضه، حصل خير.. انا مليش فى السياسة ولا بحبها! ومهما احنا فهمنا فيها فى حجات كتير أوى.. أوى ناقصة ومش هنعرفها وبتبقى من تحت لتحت وده رإيى".

وتابعت قائلة: "القناة الأولى كانت جايبة الريس قبل ما انزل #المسجد_النبوى_الشريف وانا حلمت بالرئيس هنا! والله حصل! بس الراجل ده شايل كتير اوى..ب١٠٠ راجل قبل ما يبقى رئيس بلد..هاتلى حد يثق فى رجالته وشعبه ويغامر ويشيل كفنه على ايده ويخلصنا من حجات كتير!سيادة الرئيس عبد الفتاح السيسى..انت راجل عظيم..انا حبيتك من حب امى وابويا ليك وربنا يقدرك.. كفاية ان الواحد فخور انه مصرى وهو هنا فى #السعودية وشوفوا الناس بتحبنا ازاى وبتقول عليه ايه".

وختمت رسالتها قائلة: "اه احنا مضغوطين كلنا بس شال حمل تقيل ولسه هيشيل واحنا معاه.. ده انت لما باباك بيقولك هنضطر نقلل المصاريف عشان احنا فى ضيقة مبتفتحش بوقك! وانا من الناس اللى تضررت معلش هنستحمل بس نعيش فخورين اننا مصريين.. معلش هنستغنى عن رفاهيات كتير وانا اول الناس بس يبقى ليا بلد يحلم العالم بيها.. معلش هحاول بس أبقى مصرى والناس عارفة يعنى ايه #مصر.. شعب ملوش كتالوج اقسم بالله! احنا اللى خلينا الاحتلال طفش مننا.. احنا معروفين مفيش حد زينا اتغاظت من زمايلى اللى قابلوك! بس نفسى اتكلم بلغتى وعلى طبيعتى عن بلدى انا مش شبههم فى الرسميات #المصرى #معروف #بجبروته احنا معاك يا #ريس #الرئيس #عبدالفتاح _ السيسى".