وجه أحد المواطنين رسالة إلى الرئيس عبد الفتاح السيسي، بعنوان "بدون خوف ولا زعل اسمعني يا ريس" شملت مجموعة من النصائح وتمثلت في:

1- سيبك من الإخوان، كدة كدة ربنا حمانا من شرهم، ورجال الداخلية شايفين شغلهم تمام.

2- امنع استيراد أكل القطط والكلاب والشوكلاتات وبنس الشعر والشيبسى والجبنة والمكرونات الملونة وسجاجيد الصلاة والبراويز والشمع وكل الحاجات اللى مش هنموت من غيرها وشوف هتوفر دولارات أد ايه

3- امسك الكتب الخارجية وأعمل كتب الوزارة زيها وامنع طباعة الكتب الخارجية، هترحم الأهالى وهتوفر مليارات

4- عندنا استعداد جميعا نستغنى عن البراندات ونلبس خيش ونمسك شنط خضار وجزم من باتا، ولما تعطش السوق هتلاقى المصانع المصرية للبس والجلود هتشتغل وشغل نضيف كمان، مفيهاش حاجه منبقاش كلاسى وستايلش أربع خمس سنين عشان خاطر بلدنا

5- امنع الحياه السياسية بالدراع عن كل فاسد وحزب وطنى من ايام مبارك ومعلش تعالى على نفسك وكن ديكتاتوريا فى النقطه دى بالذات، والشعب كله معاك فى ضهرك يا ريس

6- اقاله جميع اللواءات الكبار فى السن، اللى ماسكين كل خرم ابرة فى الدولة كفاية عليهم شغل كده يستريحوا شويه بقى ويلعبوا مع أحفادهم وعين كفاءات شابة، دماء جديدة يا ريس هتلاقي مبدعين

7- معاش مبكر لكل رؤساء الأحياء والمجالس المحلية "سرطان الفساد فى مصر يا ريس"، والمناصب الكبيرة وعين شباب معروف عنهم الشرف اكيد هتلاقى حبة شرفاء لسة موجودين فى البلد يعنى، والله هتلاقي كتير بيعشق تراب البلد دى.

8- أى فلوس تبرعات تجمعها لأى صندوق تعمل بيها مشروع حي قدام عنينا أول بأول نشوفه، معلش يا ريس.

9- أوقف نزيف الملايين اللى بيلهفها استشارى المصالح الحكومية اللى عاوز يشور علينا ببلاش يتفضل واللى مش عاوز يقعد فى بيتهم كده كده شورتهم بتبقى سوده.

10- اقفل كل قنوات العهر والرقص وإعلانات الجنس والشعوذه القذرة، لو عاوز تقبض على أصحابها بتهمه النصب او نشر الفسوق هتعرف توصلهم كويس، واحنا بردة كلنا معاك.

11- أجمع أصحاب شركات الإنتاج السينمائي والفنى مع السيناريستات والمؤلفين والموسيقين المحترمين وحطوا خطه للنهوض بالفن والذوق العام، ودى أهم نقطة يمكن أهم من قناه السويس الجديدة، و بردة هتلاقي مصر كلها معاك والله، كلها فى النقطة دى بالذات

12- عين وزير ثقافه مثقف

13- مع ان جيشنا هو اللى بيلحق البلد فى اى ازمة، يشيل ماية الفيضانات، ويبنى الوحدات السكنية و الكبارى وغيرها، لكن فيه ناس متخصصة للحاجات دى لازم يتحاسبوا يا ريس على اهمالهم بقوة.

14- الوزير الفاشل يخرج منها بمرتب آخر منصب قبل الوزارة.

15- اطلب من كل رجل أعمال إنشاء مصنعين فى محافظتين مختلفين مقابل الارض والاعفاء ضريبى واعلانات مجانية.

16- اللى يسرق يتحاسب واللى يتسبب فى كوارث إهمال يتحاسب.

17- هات 2، 3 شباب متخصصين ودارسين فى كل قطاع من قطاعات الدولة وياحبذا يكونوا معارضين، هتسمع منهم اقتراحات وحلول سحرية للنهوض بالقطاع.

يا ريس .. احنا مش هنفتى ولا نتدخل فى السياسة وواثقين فى ربنا ثم فيك، لكن لازم صوتنا يوصل، لان ده اللى احنا حاسين بيه، واحنا معاك