نشر الدكتور ناجي الشهابي، رئيس حزب الجيل، على صفحته الشخصية على موقع التواصل الاجتماعي« فيس بوك»، اتهامات للدكتور جمال سامي محافظ الفيوم الجديد، بالتورط في واقعة شهادات الدكتوراه المضروبة بعين شمس.

وجاء منشور الشهابي على النحو التالي: «سيبكم من محافظ القاهرة الجديد، واقروا الحكاية دى للآخر.. نشرت جريدة ما تحقيق في ٢ يوليو ٢٠١٠ عن شهادات ماجستير مهنية ودكتوراه مهنية مضروبة من جامعة عين شمس بالاشتراك مع جامعة أمريكية اسمها «ويست بروك».. تقدم للشهادات دى 1232 طالب مصري دفعوا 30 مليون جنيه.. كل طالب كان بيدفع 3350 دولار للماجستير و4600 دولار للدكتوراه.. كان نصيب جامعة عين شمس طبقًا للعقد الموقع بين الجامعتين فى 28 فبراير2008 مبلغ 350 دولار من كل طالب ماجستير و600 دولار من كل طالب دكتوراه ثم تم تعديل نصيب جامعة عين شمس في 20 أغسطس 2008 لتصل إلى 1100 دولار للماجستير المهنى و1500 للدكتوراه المهنية، ووقع العقد د. جمال سامى نائب رئيس الجامعة كطرف أول، والدكتور محمد مدحت منير رئيس الأكاديمية الكندية لتكنولوجيا المعلومات، باعتباره الممثل الرسمي لجامعة ويست بروك الأمريكية «المعهد الأمريكى للإدارة».

واستكمل الشهابي «قام بعض الطلاب اتصلوا بجامعة «ويست بروك» الأمريكية... فقال لهم الأمريكان احنا منعرفش حاجة عن المشروع ده خالص انتم مين ؟!!... رجعوا الطلبة لجامعة عين شمس فقالت لهم إن الجامعة الأمريكية المتعاقدين معاها هى «إيه آى إم ويست بروك» وليس ويست بروك».

وأضاف الشهابي «التفتيش في سجل الجامعات الأمريكية طلع مفيش أساسًا جامعة بالاسم ده !! وإن ده مجرد موقع على النت فقط «جامعة اون لاين» !! فشهاداتها لن تكون معتمدة... فثار الطلاب وعملوا ثورة عاوزين فلوسهم...اجتمع بيهم د. جمال سامى نائب رئيس الجامعة لشؤون خدمة المجتمع والبيئة ورئيس المشروع وأقر أن الجامعة الامريكية حقيقية.. ودافع دفاع مستميت عن المشروع.. بالكشف عن الايميل ده ظهرت مفاجأة مذهلة... إن الاكونت ده اتعمل فى يوم الثلاثاء 26 يناير 2010 الساعة 20:40:34 من مصر عند شركة te data، أما البريد الموجود فى التقديم [email protected] فهو موجود فى مصر برضة عند شركة Link.net... !!!!!!

وتابع رئيس حزب الجيل، «ثار الطلاب وثار الإعلام وقام د.هانى هلال وزير التعليم العالي بتحويل الموضوع للرقابة الادارية.. فقرر د. جمال سامى رئيس المشروع إلغاء المشروع وإعادة الفلوس للطلبة بعد خصم المصاريف الإدارية 500 جنيه بشرط عدم تقديم اى شكوى للنيابة !!».

واختتم، «كان مين بقى رئيس الجامعة ساعتها.. ايوه... د. احمد ذكى بدر.... اللى النائب بتاعه كان د. جمال سامي... طب راح فين بقى د. جمال سامى ؟..... اتعين امبارح محافظ للفيوم».