قالت "حنان" وهى إحدى الناجيات من الحادث الإرهابي بالمنيا، "تحركنا بالاتوبيس من الفشن، وصلنا بني مزار اخدنا قرايبنا، كملنا على مغاغة للدير وصلنا المدق، عند نص المسافة تقريبا".
وأضافت "الناجية": "فجأه 4 عربيات جيب "بيج" نزلوا منها كتير ملثمين وفي جبهتهم العلامه "شعار لا اله الا الله" قاموا بضرب نار في كل الأتوبيس ليتوقف إجبارا، وفتحوا الباب وضربوا السواق بالآلي ونزلوا الرجالة، حد من اللي جوه - فكر يقفل باب الاتوبيس - ونادى على بيشوي ! حاولوا يدخلوا من الباب معرفوش - دخلوا من شباك السواق وضربوا بيشوي بظهر الآلي، وضرب نار مباشر لكل اللي باقي في الرحلة.
وتابعت: "في نفس اللحظات تزامن قدوم عربيتن - ربع نقل تويوتا - من المقابل " يعني جايين من الدير " نزلوا ونزلوا العمال اللي فيهم وضربوهم بالنار كلهم على مشهد من اللي متبقيين أحياء في الاتوبيس.. ورجعوا تاني للاتوبيس وقالولنا " هاتوا الغنيمه " يعني الذهب، قلعوا الذهب اللي معاهم، بعدها قالهم قولو "لا اله الا الله" قولي يا ست ومش عايز نسمع صوت".
وأكملت: حنان ضمت ابنها ذات ال7 اشهر في صدرها كانها ترضعه لتغلق فمه - اللي بيصرخ - لحسن يسمعوه ويقتلوه.. وسابوا الاتوبيس وراحوا ولعوا في عربية من عربياتهم اللي اتعطلت ومدراتش وحرقوها تمام - علشان حرق معالم الشاسيه وخلافه".
وأردفت قائلة: "وابل من النار مره أخرى على كل الأتوبيس - بغرض انفجار التنك ليشتعل بمن تبقي فيه "حي وميت" ليحرق كاملا ولكن لم ينفجر! ومشيوا بعربياتهم الجيب ناحية الجبل في الرمل تجاه المنيا !!".
"حنان" فقدت ابنها، وزوجها ووالدها وحماها في الحادث، حيث يذكر أن مجهولين أطلقوا النار على أتوبيس يقل عدد من الأقباط، فى رحلة دينية، من محافظة بنى سويف للمنيا، مما أدى لاستشهاد عدد كبير منهم، وإصابة أخرين.
