وجه ضابط شرطة مصري يدعي "محمد.ع"، رسالة الى أمراء الجماعات الإرهابية، قائلآ: إذا كان الهدف من التفجيرات التى يقوم بها أعضاء الجماعة من المغرر بهم هو كما تدعو أنهم سيكونون شهداء، وأن الجنة ستكون فى انتظارهم فلماذا لاتقومون بهذه المهمة؟ "وتقوموا بتولية أمر الجماعة لنوابكم أمير واحد راجل يعملها عشان يكون القدوة لهؤلاء ياشوية نصابين".

واستكمل الضابط رسالته من خلال بوابة" المواطن" قائلا: "انتوا مأجلين موضوع الجنة وسيبنها لغيركم، ولا من كتر حبكم فى البشرية اللي حواليكم عايزنهم يسبقوكم علي الجنة"، "طيب وانتوا هتقعدوا فى الدنيا وسط الكفرة تعملوا ايه لوحدكم ماتفجروا نفسكم وتخشوا انتو الجنة، "ولاعندكم شوية مشاوير فى الدنيا عايزين تخلصوها الأول احنابس بنستفهم يمكن عندكم وجهة نظر إحنا مش فاهمنها ولا مشاويركم فى الدنيا الى عايزين تقضوها، هو إنكم يبقى ليكم حريم وتتجوزوا وتطلقوا وتعيشوا ويتكاثر المسلمون".

واختتم قائلا: "تسرقوا محلات الدهب من المسيحين الكفرة عشان تاخدوا فلوس تبقى غنايم ولا عايزين يبقالكم عزوة وسلطة وتبقى رأسكم برأس الدولة وكله جهاد، إحنا شايفين إن الأفضل لينا وليكم إنكم تفجروا نفسكم وتسبقوا علي الجنة بتاعتكم اللي فى خيالكم المريض، ومتنسوش تعينوا النواب بتوعكم أمراء بدالكم، لو راجل اعملها، يا أفاق منك ليه، أمير واحد منكم يفجر نفسه لو راجل".