بالصور| إيناس عزالدين توجه رسالة لجمهورها من داخل المستشفى
الثلاثاء 09/يناير/2018 - 12:35 م
أميرة حماد
طباعة
وجهت الفنانة الشابة إيناس عزالدين، نجمة برنامج "أرب أيدول"، رسالة خاصة لجمهورها بعد إفاقتها من عملية جراحية كبيرة، خاضتها داخل إحدى مستشفيات القاهرة الكبرى.
وكتبت إيناس، عبر حسابها الرسمي بموقع التواصل الاجتماعي "فيس بوك": "أول يوم أفوق فيه وأفتح عيني من بعد العملية، عدت علي الأيام اللي فاتت، كنت بتمنى من ربنا إني ما أفوقش من المسكنات ولو للحظة، علشان ما أحسش بالألم اللي بالنسبالي كان لا يحتمل بما تحمله الكلمة من معنى، ولسه بحاول أتجاهل عذاب الألم علشان بس أقول لكم كلمتين من جوه القلب".
وتابعت: "عايزة أقول لكم في عز تعبي ونومي كان زوجي أحمد يمسك الموبايل يقرالي رسايلكم وتعليقاتكم وبوستاتكم ودعواتكم، ويحكيلي عن مكالماتكم، وكنت بسمع وبحس حتى وأنا مش في وعيي، لم أصدق كم المكالمات والدعوات والرسائل والخوف والقلق اللي كانوا عندكم عليا، كأني من دمكم، أنا مش عارفة أقولكم قد إيه أنا اكتشفت إني غنية ومليونيرة بس مش فلوس".
واختتمت: "غنية ومليونيرة بيكم، أنتم أعظم كنز ممكن إنسان يتمناه، كل دعوة خففت عني ألم وكل لحظة خوف هونت عليا تعب، صدقوني لو عمري بإيدي هديهولكم، علشان هو بالفعل ملككم أنتم يا أهلي وأصحابي وجمهوري #يا_تاج_راسي".
