قراية.. ومن أول السطر
وكان صعب الغروب جواك
وكان أصعب
تعيش على هامش البدايات
كأنك طيف
كان صعب الخروج من الضل
وكان أصعب
وجودك تحت ضي الشمس
ومابتتشفش
كان صعب الوجود بالحلم
وسط ضباب متاهات الفضا المجروح
كان صعب الميلاد بالعكس
من اخر مدى ف الروح
فكان لازم
تكون حدوته ف الممنوع
مكتوبه بحبر الرغبة والتفسير
كان لازم
تهزم لحظه موجوعه ف ضلوعك
وتتعكز على سطرك
تمشى بعيييد
لاخر ملتقى للشوف
كان لازم
تكتبها ف دفتر التواريخ
بانك حى
من غير روح