إسلام فصيح .. أوجعه موت أبيه فلجأ إلى الرسم من أجل تذكره

الأربعاء 24/أكتوبر/2018 - 12:09 م

شيماء اليوسف

رحل والد إسلام فصيح وكانت فاجعة الموت صادمة لكنها أنبتت في روحه عنان الموهبة وكأنها مثلت عودة الروح للجسد، تراءت للفنان ملامح والده في غرفته في نافذة منزله في زوايا الشرفة وأدراج المكتبة، تخللت كل أركان البيت الذي يسكنه وتطلع إلى رسم بورتريه بأنامله تجسد فرشاته بر الوالدين في صورة ولكنه كان قد نسى الرسم.

فكر إسلام في الاستعانة بأحد الفنانين المحترفين لكي يرسم له لوحة لوالده، لكن غلاء السعر كان حائلا بين رغبته وهدفه فقرر أن يتعلم الرسم ويقوم برسم والده بذاته، ويقول ل"بوابة المواطن" وبعدين والدي توفي وأنا كنت عاوز اعمل ليه بورتريه وجيت كلمت واحد عشان يعملي واحده ساعتها كان سعرها غالي ف قولت طيب ليه ما أتعلم أنا وارسمه وحتي لو طلعت حلوة فرحتها هتبقي اكبر عشان أنا اللي راسمها".

محمد صلاح

بدأت موهبة إسلام فصيح (20عاما) منذ طفولته وتحديدا في المرحلة الابتدائية، وكانت أول تجربة عندما نظمت المدرسة مسابقة لأجمل لوحة من كل فصل، حيث نالت لوحته إعجاب إدارة المدرسة وقاموا بتقديم أدوات للرسم كجائزة له تقديرا وتحفيزا، ويضيف: " موهبتي بدأت وأنا ف ابتدائي عملت لوحه ف الفصل وعجبت المدرسة كلها وبعدها جابوا ليا أدوات رسم ورسمت كاريكتير عجب المدير والمدرسين ومن ساعتها بقيت برسم اسكتشات صغيرة والحوار ده كان في أولي ابتدائي وبعدها بطلت رسم لحد 3 ثانوي".

أعمال إسلام فصيح

استخدم إسلام فصيح الإنترنت لتلقي الدروس التي تساعده في إتقان موهبته وتحسين مستواه ف مجال الرسم يتعرف على الخامات والأدوات وأنواع الرسم وطرق التجريب عبر فيديوهات كان يشاهدها بواسطة اليوتيوب، ويقول : "قعدت فترة متابع فيديوهات ع اليوتيوب وجيبت اسكتشات كتيرة وقعدت أجرب وبقيت ارسم صحابي ومرة ع مرة بقيت ارسم مشاهير ومن ضمنهم محمد صلاح لأني بحبه من زمان".

أعمال إسلام فصيح

تحسن مستوى إسلام فصيح في الرسم بعد أن اهتم بتطوير ذاته وتنمية قدراته، حتى لقبه أصدقائه وأقاربه بالفنان وذاع صيته وسط أبناء قريته " نزلة الشوبك بمحافظة الجيزة، وقد أضاف:" ومرة علي مرة بقت كل رسمة بقت بتطلع احسن من اللي قبلها وكنت ببقي فرحان جدا من تفاعل الناس عندي ع الايميل وبقيت فرحان اكتر طبعا بمستوايا اللي بيتطور ".

أعمال إسلام فصيح

نجح إسلام فصيح في تخطى أخطائه التي كان يقع فيها في لوحاته الأولى حتى تمكن من تلاشي الوقوع في هذه الأخطاء وتصليحها وفعل كل هذا بمفرده ومن خلال بحثه عبر مواقع التواصل الاجتماعي ومن الاحتكاك بأصحاب الخبرة في هذا المجال بدون اللجوء على دورات تدريبية في مجال الرسم، ويضيف:" كنت بطور من مستوايا أني جيت فترة ضغطت علي نفسي وكنت برسم كتير أوي وبقيت بشوف الغلطات اللي الناس بتقولي عليها ف رسمي وبقيت بصلحها وبعدين أنا كنت حاطت هدف ف دماغي أني هتطور نفسي بنفسي من غير كورسات والحمد لله لحد دلوقتي مخدتش كورسات".

أعمال إسلام فصيح

يعتبر إسلام فصيح والدته الجندي المجهول في حياته حيث تقوم بتشجيعه الدائم ليقدم الأفضل في مجال الرسم، ويسعى إسلام للوصول إلى مستوى احترافي في مجال الرسم، حتى يرد جميل والدته عليه ويضيف :" كنت كل شوية برسم محمد صلاح عشان أنا بحبه وكان نفسي انه يشوف رسمتي ليه وكل هدفي ف الرسم ده أني أوصل لمستوي كويس جدا يخلي والدتي تكون فخورة بيه قبل ما أنا أكون فخور بيه طبعا لان أنا نفسي اعمل أي حاجه تفتخر بيها بيا قدام الناس".

أعمال إسلام فصيح

رفض إسلام فصيح العديد من اللقاءات التليفزيونية التي تقوم بتشجيع المواهب لكنه كان يرفضها بشكل مستمر وهذا يعود لاقتناعه بأنه لازال يحتاج المزيد من الوقت للوصل إلى الاحتراف، ويضيف:" كان دايما مع الوقت بيجيلي لقاءات تلفزيونيه بس كنت برفض لان أنا شايف إن مستوايا لسه مبقاش المستوي اللي أنا بحلم بيه ومش غرور والله بس كل الحكاية نفسي لما اطلع ع التلفزيون أكون حاسس إني استاهل".

أعمال إسلام فصيح

يسعى إسلام فصيح ليكون إنسان ناجحا في حياته في مختلف مجالاتها لاسيما بعد الظروف الصعبة التي تعرض لها بعد وفاة والده والتي أجبرته على ترك دراسته بكلية السياحة والفنادق، ويضيف:" إن شاء الله بخطط إني أكون ناجح ف حياتي و أكون أنا الإنسان اللي أمي وكل اللي يعرفني يكون فخور بنجاحي واني اثبت لأي حد أن مفيش حاجه اسمها مستحيل، ع الوقت ومع الإرادة والعزيمة والإسرار أن شاء الله هوصل".