الرئيس السيسي يضع محافظ القاهرة فى موقف محرج بـ 3 أسئلة ويعلق: طبعاً متعرفش
253
وضع الرئيس الرئيس عبد الفتاح السيسي، اللواء خالد عبد العال محافظ القاهرة، فى موقف لا يحسد عليه اليوم بعدما وجه له عدد من الأسئلة التى تتعلق بدخل المحافظة والمنشآت التي تمت من كبارى ووحدات إسكانية، وعجز المحافظ عن الاجابة على تساؤلات الرئيس السيسي والتزم الصمت.
وقال الرئيس السيسي للمحافظ: صندوق العشوائيات بيجمع كم او فيه كم فلوس؟ طبعا متعرفش: سؤالي التاني دخل المحافظة كم؟، لم يرد المحافظ، ويباغته الرئيس: تصدق وتأمن بالله انا عارف دخل مصر كم بالحتة .. ده شغل اذا مكنتش تعرف كل جنيه فى محافظتك وازاي تعظمه وازاي تكتره عشان نحل مسائل زي دى! .. طب هقولك اتعملك كم كبرى فى الاربع سنين اللي فاتو؟، صمت تام من قبل المحافظ.
الرئيس السيسي: انا مقصدش بكدة حاجة لأن أنت هتقعد مع ناس مواطنين وعايز تتكلم معاهم لما تيجى تتكلم معاهم لازم تبقى عارف راسك من رجليك فكل شئ .. واعمل من اللي انا عارفه ده سياق اتكلم معاهم فيه؛ خلوا بالكوا أنا عندي كذا وبكسب كذا وبصرف كذا وبعمل كذا والدولة عملت كذا وانا عملت كذا وده اقصى حاجة عندنا .. طب مش عاجبنا .. مهو ده اقصي حاجة عندنا .. انما لو انا معملتش كدا مش بقصدك انت والله انا بقصد كل زمايلنا اللي بيتكلموا مع الناس.
وتابع الرئيس: "طب خلى اى حد فمصر يتكلم معايا مش عشان حاجة حافظها عشان ارد .. عشان محدش يقولي كلام مترتب كده وهو ده الحقيقي لا طبعا مش حقيقي بدليل اللي احنا بنورهلكوا ده .. فلابد أن المسؤول يبقي عنده سياق لوظيفته عملنا وعملنا وبنعمل وبنعمل والفلوس اللي معايا كذا والمنتظر كذا .. ده من ضمن مكملات وظيفتنا في ظل ظروف منطقتنا واللي حصل فيها فى 2011 وغضب الناس جزء كبير منه اننا مكنش عندنا سياق للواقع نتكلم فيه مع الناس ونقول الحكاية ايه وجايا ليه وليه وصلنا لكده.
يذكر أن الرئيس عبد الفتاح السيسي افتتح اليوم مشروع الإسكان الاجتماعي أهالينا 1، كما افتتح الرئيس السيسي مشروع الإسكان الاجتماعي بمدينة بدر، بجانب مشروعات الإسكان الاجتماعي بمحافظة جنوب سيناء، وغيرها من المشاريع.