كشف الفنان خالد عليش، عن الأسباب التي دفعته لمغادرة إذاعة نجوم إف إم، وترك برنامجه الشهير معاك في السكة.

خالد عليش يتخلى عن برنامجه معاك في السكة

وقال "خالد" على حسابه بموقع التواصل الاجتماعي "فيس بوك": "لكل اللي بيسأل واللى مهتم واللي مش مهتم.. انا ليه مش في نجوم اف ام السنة دى.. للأسف وببالغ الحزن والأسى مش هكون ضمن فريق نجوم إف إم السنة دى يعنى مفيش معاك فى السكة ولا موقف في 2019".

وأضاف "أسباب كتير هي السبب في القرار ده منها الميعاد الصعب جدًا، وخصوصًا اني بشتغل حاجات تانية منها اني بمثل وغيره.. بس اللي يعرفني كويس في الشغل يعرف اني بحب التجديد دايما ومحبش اقف عند مرحلة معينة من النجاح وخلاص".

وتابع عليش حديثه: "نجاحي في نجوم اف ام مكانش معتمد عليا انا بس، بالعكس انا كنت جزء صغير جدًا من منظومة اتشرفت انى اشتغلت معاهم من أصغر شخص لأكبر شخص.. ولآخر لحظة علاقتنا زى الفل يعني مش ماشي بمشكلة ولا حصلت خناقة عشان الإشاعات المغرضة وكان من أهم أحلامي اللي عافرت كتير عشان أوصله انى اشتغل مذيع في نجوم اف ام".

واختتم خالد عليش كلامه قائلًا: "انا سايبلكم خالد جواد مكانى عشان الوحيد اللي لقيته اسمه خالد ربنا معاه ان شاء الله ونجوم اف ام كلها في ضهره.. انا اسف لكل اللي اتعودو يروحوا على البرنامج ولكل اللي مزاجه بيظبط مع الهلي بس هي سنة الحياة التغيير.. مش عايز حد يزعل وعايزيكم تقفوا معايا في خطواتي اللي جاية وبلاش عبارات ليه يا معلم تعمل كده ده انتا كنت مكسر الدنيا ولا بصات الشفقة عشان انا فيا اللي مكفيني.. انتظروا تفاصيل اكتر عن المشروع الإذاعي القادم في الأيام الجاية".