- أنتِ مسكينة يا فايزة
= مسكينة ليه ! أنا مش مسكينة ولا حاجة الناس هما اللي مساكين
- قوليلي الحق يا فايزة من غير كدب أنتِ جيتي النهاردة ليه؟
= علشان أديك اللي أنت عايزه، أنا جيت مرة وطردتني لأنك مرضتش تقربلي المرة دي جيت وناوية أخليك ما تطردنيش
- وأيه اللي خلاكي تغيري رأيك؟
= الناس، الناس اللي زيك ما حدش رضي يقبلني بشرفي وكرامتي، كل طريق مشيت فيه لقيته مسدود بالسفالة والإنحطاط والأخلاق البطالة، فقررت انا كمان أكون سافلة ومنحطة عشان الطريق ينفتح قدامي
- أنتِ مقتنعة باللي بتعمليه؟
= أنا حاولت كتير، كملت تعليمي عشان أهرب من جو البيت واشتغلت عشان ما احتاجش لحد، سافرت وكلي أمل أني ألاقي جو أنضف من بيتي اللي كنت عايشة فيه، حاوطوني الديابة من كل ناحية ولما ما رضيتش أجاريهم اتقلبوا عليا، ملوا البلد عني بالإشاعات لغاية ما حققوا معايا وطبعًا شهدوا كلهم ضدي، لجأت لإنسان كان له مَعَزة في قلبي قُلت ده اللي هيحميني منهم لأنه يختلف عنهم طلع جبان زيهم وخيب أملي فيه، بعدت عن الناس.. الناس ما سابتنيش في حالي، اختلطت بالناس حاولوا يحطموني كان لازم أستسلم من زمان عشان استريح وأريح الناس
- غريبة ! لكن أنتِ ما جاوبتنيش على سؤالي، إن أنتِ مقتنعة باللي بتعمليه؟
= لا، نفسي ضميري يموت عشان أستريح
- يبقى لازم تعرفي إن مش كل واحدة تقدر تمشي في السكة دي، إنتِ جيتي هنا وانتِ مش مقتنعة باللي بتعمليه، جيتي غصب عنك لأن الناس دفعوكي للطريق دة وكانت النتيجة إنك إتلخمتي وارتعشتي وبقيتي زي لوح التلج وكان ممكن تخسري كل حاجة في لحظة واحدة وترجعي تندمي عاللي عملتيه طول عمرك
= دة الحل الوحيد اللي لقيته قدامي
- أبدًا، خليكي في الطريق اللي ماشية فيه طول عمرك
= وأرجع أقاسي وأتعذب من تاني من شرور الناس ؟
- مهما تعذبتي هيكون عذابك أرحم من العذاب اللي هتشوفيه لو مشيتي في طريق تاني
= أنا مصدقة كل الكلام اللي بتقوله إنما أعمل إيه وأعيش إزاي مع الناس
- ما تعمليش حاجة ضد مبادئك ضد طبيعتك، ما تعمليش حاجة ترجعي تندمي عليها، أنا أكبر منك يا فايزة وأعرف الدنيا أكتر منك وما تفتكريش أن أنا سافل، أنا سافل بس مع السفلة لكن انتِ حاجة تانية أنتِ رقيقة وكريمة وطاهرة خليكي زي ما أنتِ وسامحيني إذا ظلمتك في الأول وسامحي الناس إللي ظلموكي لأنهم ما كانوش يعرفوكي
= أنا متشكرة قوي يا أستاذ
- توعديني
= أوعدك

اقرأ ايضًا: كلمة في مشهد| الكونياك دا مشروب البنت المهذبة