كشف الفنان أحمد أمين في صاحبة السعادة عن مفاجأة عمله وهو طفل مع أثنين من الفنانين المشاهير حاليًا وذلك في البرنامج الذي تقدمه الفنانة إسعاد يونس على فضائية dmc.

أحمد أمين في صاحبة السعادة
وقال أحمد أمين في صاحبة السعادة: " أول ما بدأت وانا صغير مسرح كنت في 5 ابتدائي واخويا كان طالب في فنون جميلة وعاملهم مشاكل في البيت بقعد أمثل والبس بطاطين واعمل شخصيات اي كلام فارغ، وبعدين اخويا الكبير قالي تعالى عايزين طفل يمثل في مسرح الكلية، روحت لاقيت ناس كتير واتنين في دفعة واحدة بيومي فؤاد وماجد الكدواني كانوا طلبة في الكلية الأتنين مع بعض وخريجين فنون جميلة، وانا كنت صغير وبشتغل في مسرحهم في مسرح فنون جميلة".

وأضاف: " وهما لسة عاملين فيلم مع بعض وفي كيميا بينهم ودي موجودة من زمان ولو عملوا حاجة تانية مع بعض هتبقى فظيعة ومن ساعتها وانا مسكت في المسرح، وانا عندي 15 سنة اقنعت صحابي كنا بنشتغل في مركز الثقافة الجماهيرية، واشتغلت قبلها في قطاع الفنون الشعبية مسرح تحت 18 وفي مسرح الثقافة الجماهيرية اقنعت صحابي ان أخرج حتى مجلة كاريكاتير كتبت عن الموضوع ودة مش افيه ده فعلًا، كتبت ان في مخرج عنده 15 سنة".

وأوضح أحمد أمين في صاحبة السعادة : " بعد العروض كان في الندوات كانو بيحطولي شلته على الكرسي زي الخشبة اللي عند الحلاق كدة، في ندوة مع المخرج كانو بيحطوها، وانا فاكر مرة في ندوة وناس محترمة ونقاد وكنت أخرجت انشودة الدم بتاعت الدكتور مصطفى محمود، قاريتها واتاثرت لأن أصحابي كبار مش صغيرين ممثلين كبار في الثقافة الجماهيرية وواحد من النقاد وانا قاعد على الشلته دي قعد يقول كلام كبير وانت متأثر بفكر هيجل وانا طفل قولتله بمنتهى البراءة مش قصدي افيه، قولتله حضرتك انا معرفش غير محمد حسنين هيجل بمنتهى البراءة مش قصدي اهزر، طبعًا الندوة اتقلبت هزار سيبوه ده هو بالفطرة كده، وانا فاكر ساعتها كنا في مهرجان ومخدتش الجايزة علشان معييش بطاقة".

اقرأ أيضًا: أحمد أمين ضيف «صاحبة السعادة» في هذا الموعد