أخطاء بتقعي فيها مع الهايلايتر

الثلاثاء 07/مايو/2019 - 02:21 م

أخطاء الهايلايتر

اية محمد

الهايلايتر واحدة من خطوات المكياج اللي بتدي لوك حلو جدا وبتظهر ملامح الوش اكتر، وبيتحط في أماكن معينة بس على الوش عشان يسلط الضوء عليها اكتر ويظهرها، لكن عشان اللوك يطلع حلو يبقى لازم اننا نعرف نحط بشكل صح وبسيط ومش مبالغ فيه.

أخطاء بتقعي فيها مع الهايلايتر:

1- وضع هايلايتر كتير زيادة عن اللزوم:

من اول الغلطات اللي ممكن تكوني بتقعي فيها انك تحطي هايلايتر بكمية كبيرة زيادة عن اللزوم وتفكري ان اللوك هيطلع احلى او هيظهر الملامح اكتر لكن بالعكس الوش هيطلع فيه لمعة زيادة عن اللزوم ومش حلو، عشان كده حاولي انك تحطيه بكمية مناسبة.

2- طبقات اكتر من اللازم:

حتى لو بتحطي على المنطقة المناسبة على الوش ممكن تقعي في غلطة تانية انك تحطي طبقات كتير من الهايلايتر في منطقة واحدة من الوش وتركزي عليها زيادة عن اللزوم، عشان كده بدل التركيز على منطقة واحدة وزعي الهايلايتر على كل المناطق اللي عايزة تظهريها في الوش.

3- استخدام درجة غلط:

الهايلايتر عموما يعتبر شفاف ودرجاته اكيد افتح من كريم الأساس، لكن برغم كده اختيار الدرجة الغلط ممكن تكون من الغلطات اللي ممكن تقعي فيها لان بردو كل درجة بشرة ليها درجة هايلايتر تناسبها اكتر، كقاعدة عامة لو انتي بشرتك سمرا يبقى اختاري درجات الهايلايتر اللي على ذهبي وبرونزي، وللبشرة الفاتحة اختاري درجة الهايلايتر العاجي.

4- بتركزي على الأماكن الغلط:

من الغلطات انك ممكن تحطي الهايلايتر في اماكن غلط على الوش، افضل اماكن لتطبيق الهايلايتر هي عضم الخد، قوس كيوبيد، الزاوية الداخلية للعيون، طرف الانف، وممكن تشوفوا توزيع الهايلايتر لو هتستخدميه مع الكونتور زي ماهو باين في الصورة اللي قدامنا.

5- بتحطيه على الوش كله:

الهايلايتر عشان بيدي لوك حلو للوش ممكن ده يغريكي انك تحطيه على الوش كله ودي الغلطة اللي ممكن تقعي فيها وهيديكي نتيجة عكسية وهيبين الوش كلنه عرقان ده غير انه مش هيسلط الضوء على الملامح اللي عايزة تظهريها.

6- مش بتدمجيه كويس:

الهايلايتر لازم تدمجيه كويس على الوش لأنه لو مندمجش هيبقى عبارة عن خطوط منفصلة بتلمع على الوش، عشان كده لازم يندمج كويس على البشرة ويطلع بشكل سلس وناعم مع باقي المكياج مش مكون منفصل.

7- مش بتستخدمي الأداة المناسبة:

عشان الدمج انتي محتاجة تستخدمي الأداة المناسبة، للهايلايتر الكريمي ببساطة ادمجية على البشرة بصوابعك، ومع الهايلايتر البودر استخدمي الفرشاة ال Fan Brush زي اللي مستخدماها في الصورة بالظبط.

8- بتطبقيه على الخدين والانف بس:

الخدين والأنف هي أكثر المناطق المشهورة اللي بيتحط فيها الهايلايتر لكن مش هي الأماكن الوحيدة اللي ممكن يتطبق عليها الهايلايتر، ممكن تحطي على قوس كيوبيد «المكان اللي في منتصف الشفة العليا»، وعضم الحاجبين، والذقن.

9- اختيار نوع هايلايتر غلط:

الهايلايتر في منه نوعين الكريمي والبودر، والاتنين ممتازين جدا لاستخدامهم لكن بس بيعتمد امتى هتستخدميهم، لو بشرتك دهنية او عايشة في منطقة دافية الافضل تستخدمي الهايلايتر الكريمي لانه مات اكتر وبيتفاعل بشكل أفضل مع الرطوبة، واستخدمي الهايلايتر البودر لو عايزة لوك دراماتيكي اكتر ويقعد معاكى فترة اطول.

10- بتحطيه مع كريم اساس غلط:

من الغلطات اللي ممكن تقعي فيها انك تحطيه مع نوع كريم اساس غلط، ومن هنا بنقولك متحطيش ابدا هايلايتر كريمي مع كريم اساس بودر، لان ده ممكن يخلي كريم الاساس بتاعك يشقق ويعمل خطوط وقشور، عشان كده كقاعدة عامة اختاري نوع الهايلايتر نفس نوع كريم الاساس.

11- بتحطيه في ترتيب غلط:

اكيد ترتيب المكياج مهم جدا عشان يطلع مظبوط على الوش، لو انتي بتستخدمي هايلايتر بودر ممكن تحطيه قبل كريم الاساس عشان تدي لوك ناعم، لكن لو بتستخدمي هايلايتر كريمي يبقى حطيه بعد كريم الاساس يعني بيتوقف على نوع الهايلايتر اللي انتي بتستخدميه.

12- مش بتفكري في إضاءة المكان:

اضاءة المكان اللي انتي هتكوني فيه كمان من الحاجات اللي ممكن تخليكي تشوفي هتحطي الهايلايتر ازاي، لو رايحة مكان الاضاءة بتاعته عالية اوي وقوية او تحت اضاءة طبيعية بالنهار يعني يبقى ابعدي عن الهايلايتر اللي بيلمع اوي وجربي حاجة مات اكتر، وعلى العكس لو رايحة مكان إضاءته خافتة او خفيفة يبقى في الحالة دي استخدمي الهايلايتر ال Glittery أو اللامع.

13- بتحطي بلاشر بيلمع اوي مع هايلايتر لامع اوي:

لو حاطه بلاشر بيلمع اوي او برونزر مع هايلايتر لامع هتلاقي صعوبه انك تطبيقهم على البشرة صح او بشكل دقيق ومش هيطلع مظبوط على الوش، عشان كده الافضل انك تختاري نوع مات اكتر منهم هما الاتنين.

14- التركيز الزيادة على الحاجات التريندي:

الاماكن التريندي أو اتجاهات الهايلايتر هي على عضمة الخدين والأنف وعظمة الحاجبين.