حلت الفنانة "صفاء جلال" ضيفة في برنامج "كلام الناس" مع الإعلامية "ياسمين عز" على قناة "إم بي سي مصر"، وصرحت عن خضوعها لعدة عمليات لتخسر وزنها، موضحة: "لجأت لعملية نحت القوام لما تخنت أوي، وبعدها خسرت 15 كيلو جرام من وزني".

وعن إجرائها للعمليات التجميلية وضحت: "بدلع نفسي وبعمل بوتوكس وفيلر بس مبغيرش من شكلي، بس بحاول أقلل شوية تجاعيد الزمن، وأي عيادة تجميل بيبقى فيها ستات كتير أكتر من الفنانات".

هجوم المتابعين عليها بعد نشر صورة ابنتها

نشرت الفنانة صورة لإبنتها تهنئها بعيد ميلادها عبر حسابها الرسمي على "انستجرام"، وفوجئت بالهجوم الشديد عليها، حيث تحدثت عن ذلك خلال اللقاء: "كان عيد ميلاد سلمى بنتي الـ20، فكنت فرحانة على صفحتي الخاصة بتاعتي بقولها كل سنة وانت طيبة وأمورتي الحلوة بقت حلوة، ودخلت الناس كل سنة وانتو طيبين، وبعدين فجأة تحول لهجوم عنيف جدا عليا، شديد اللهجة، اتقي ربنا، اتعلمي الأخلاق من بنتك، ده أنت رجلك والقبر، فلاقيت الناس برضه بترد، الحمد لله".

العمر الحقيقي لصفاء جلال

كشفت "صفاء جلال" عن عمرها الحقيقي أثناء حديثها مع "ياسمين عز"، حيث قالت: "أنا داخلة على الـ49 سنة حاليا، أنا عشت كل مرحلة عمرية بحلوها مرها".

وأضافت: "مش بتكسف أني أقول عندي كام سنة، والناس بقيت ذكية أوي يعني مش هطلع أقولهم انا عندي 35 سنة وعمر ما السن شكل ليا مشكلة".

أبرز التصريحات عن حياتها الشخصية

أشارت الفنانة عن اختيارها لزوجها: "كلها أولويات، أنا اخترت إن نمرة واحد يبقى البيت وزوجي وبناتي وبعدين شغلي، في ناس تانية بتختار العكس، أنا اتجوزت وأنا عندي 24 سنة، صغيرة جدا، أنا اخترت أتجوز بشكل معين، وأتجوز راجل شرقي، وأمشي على هواه هو، وعلى حسب هو بيحب إيه؟، دلوقتي الستات هيشتموني على الكلام ده"، وتابعت: "أنا 90% من صحباتي مطلقات، وستات عادية مش ممثلات ولا أي حاجة".

نصيحة عادل إمام لها

وضحت "صفاء جلال" نصيحة الزعيم "عادل إمام" لها خلال تصوير مسلسل "عوالم خفية": "اشتغلت مع الزعيم في مسلسل صاحب السعادة، وغيبت شوية، وبعدين جيت أعمل دور معاه في مسلسل عوامل خفية، وكنت تخنت شوية، فقالي إيه مالك تخنتى كده ليه؟ فقلت له بسبب الاكتئاب، فرد عليا قائلًا: "أوعي تزعلي ولا تكتئبي، افرحي على طول، وحبي الدنيا، ما تبصيش للجانب السلبي في الحياة خليكي في الجانب الإيجابي، وخليكي مبسوطة على طول، عمرك ما هتكبري".