وعلى هامش مراسم قرعة بطولة الدوري للموسم الرياضي الجديد 2023 / 2022، كرمت رابطة الأندية المصرية المحترفة "أوسة" بلقب اللاعب الأكثر مشاركة بتاريخ البطولة في عدد المباريات وفي المواسم المتتالية واللاعب الأكبر سنًا.

وفي تصريحات خاصة لـ"بوابة المواطن الإخبارية"، قال عبد المنصف: "في البداية، بشكركم وبشكر النائب أحمد دياب والكابتن عماد متعب وكل أعضاء مجلس إدارة رابطة الأندية لإنهم اللي عملوا التكريم ده، الواحد كان بيتشرف النهارده إنه موجود في قاعة مليئة بالنجوم الكبار في سماء الكرة المصرية وطبعًا الأصدقاء الإعلاميين".

وأضاف حارس مرمى الزمالك الأسبق: "الواحد طبعًا بيبقى مبسوط بمسيرة كبيرة طوال 26 موسمًا، أخرها الختام الجيد في الموسم الماضي مع نادي الاتحاد السكندري الكبير، وإنجاز أكبر لاعب في الدوري المصري سواء سنًا أو مشاركة في عدد المباريات، 454 لقاء، ودي الرسالة اللي إحنا بنقدمها لكل الناس، بنقول إنك لما بتتعب وتشتغل على نفسك ويبقى عندك هدف، بتبقى دي النتيجة، إنك تيجي تتكرم، والناس بتقول إنها شايفاك وشايفة شغلك وإنك عملت شغل كويس، درع التكريم ده حاجة مهمة جدًا بالنسبة ليا، التكريم بيقول إنك حققت حاجة كبيرة في مسيرتك، هدف وحلم من ضمن أهداف كتير كان نفسك في يوم إنك تحققها".

وأكمل حارس مرمى الاتحاد السكندري حديثه قائلًا: "قرعة الدوري غير الموجهة حاجة جديدة ومهمة وبتدي مصداقية أكتر لشكل المنافسة، أعتقد إن الموسم اللي جاي هيبقى استثنائي وقوي، كل الأندية جهزت نفسها واستعدت بشكل كبير وبتدعيمات قوية خصوصًا الأهلي والزمالك، بالذات إن فيه مباراة السوبر بعد بداية الدوري بإسبوعين، لقاء هيكون صعب جدًا على الفريقين، خصوصًا إن الزمالك كسبان دوري وكأس والأهلي خسران البطولتين، وهيلعبوا على بطولة تالتة، هل الزمالك يقدر يكسبها، هل الأهلي هيقدر يعوض خسارته؟، ده اللي مستنيينه كلنا".

وواصل "أوسة": "عن نفسي أتمنى فوز نادي الزمالك بمباراة السوبر أمام الأهلي، هتفرق معاه جدًا، عشان يكمل تتويجه بالبطولات اللي فاتت، وفي نفس الوقت تديله استقرار ودافع معنوي كبير في بداية الموسم اللي جاي، بطولة مهمة مع بدايات الموسم، ودي حاجة مهمة جدًا في الفترة الجاية إن شاء الله".