نجلاء بدر: «أرفض مصطلح السينما النظيفة ومعنديش خطوط حمراء»
السبت 28/يناير/2023 - 08:15 م
مجلاء بدر ترفض تصنيف الفن
منة الله نجاح
طباعة
كشفت الفنانة نجلاء بدر عن رفضها لمصطلح السينما النضيفة، مشيرةً إلى أن الفن ليس له تصنيف سواء في السينما أو الدراما أو الأغاني.
وقالت نجلاء بدر، خلال لقائها في برنامج "سبوت لايت" مع الإعلامية شيرين سليمان، المذاع على شاشة قناة "صدى البلد": " معنديش خطوط حمراء لاختيار الأدوار وأنا أرفض مصطلح السينما النظيفة الفن ملوش تصنيف".
نجلاء بدر: «الفن ملوش تصنيف»
وأضافت: "الفن ملوش تصنيف سواء سينما أو دراما أو أغاني، أوحتى رسم، معنى كدا أن اللي بيرسم لوحة أو ينحت تمثال هل هنكسر التماثيل في إيطاليا أو التماثيل الفرعونية، الفن مجرد من التسميات، الطبخ فن طالما مش كل الناس بتعرف تعمله وفي روح وإبداع، المكياج فن".
وأوضحت: "أنا معنديش محظورات في الأدوار اللي بقدمها، لو في مشهد معملوش يبقى الشخصية مش بتاعتي هل أنا عندي محظورات مفكرتش فيها ولغاية دلوقتي لأ، بقول أنا عندي طاقة أعمل هذه الشخصية هعملها لقيت مش قادرة أعملها صح يبقى أبعد عنها".
وتابعت: "الشخصية هي اللي بتفرض نفسها مش أنا اللي أفرض نفسي دا الفن، الفن ليه أفق واسعة أكتر من اللي الناس بتشوفه، هو مش رسالة، رسالته أنه يسليك أو يحكيلك قصة ينكد عليك أو يفرجك على حاجة حلوة".
كما تحدثت نجلاء بدر عن فستانها الذي أثار الجدل في مهرجان الجونة وعلقت :" الفستان ده أنا حتى هذه اللحظة راضية ومقتنعة بيه وملبستوش عشان أبقى تريند، ونزل في الأسواق وبيتباع في وسط البلد وبيطلب من برا وبقى على اسمي ومبسوطة بده".
واختتمت: "أنا مكنتش متخيلة أنه هيعمل الضجة دي، وقابلت ناس معجبين بيه، وفي فساتين ممكن أشوفها وأقول ملبسهاش، مش فكرة خطوط حمراء لكن مش طبيعتي مش شكلي الواحد بيختار الفستان اللي بيخليه أجمل".
