ياسين من محافظة الإسماعيلية، غير قادر على أخذ حقوقه الطبيعية التي يتلقاها أي طفل في مثل عمره، وتروي جدته «الحجة أم إسلام» تفاصيل الحكاية لـ بوابة المواطن الإخبارية قائلة: «الطفل كانت أمه غضبانة من أبوه وجات ولدت عندي، وأبوه اتحبس عشان كان هربان من الجيش، ودلوقتي عايزه اسجله ومش عارفة اعمل ايه، ومعايا ورقة الولادة ومعايا الورقة اللي تثبت ان ابوه كان محبوس لمدة اربع سنين ومعايا قسيمة الجواز».

لم تتمكن جدة الطفل من حبس مشاعرها وانهارت باكية واختلط الحديث بدموعها وتابعت بنبرة مليئة بالحسرة، :«الأب قاعد عند أهله وبيتحجج كل يوم عن كتابة ابنه، بحجة تجديد البطاقة وبقاله عشرين يوم مجاش تاني، واتصلت بيه النهاردة قالي عندي حالة وفاة، لما بروح اي وحدة صحية بيطلبوا شهادة الميلاد، ونفسه يروح الحضانة وانا اللي بصرف على ياسين ومحسن أخوه انا اللي متكفلة بيهم وانا على قد حالي، واخوه محسن مكتوب والسنادي هقدمله في المدرسة واهله واخواته كل واحد في وادي ومعرفش عن أهله حاجة من ساعة ما اجوز بنتي».