«تعرضت للتحرش».. تصريحات نارية وجريئة من ميس حمدان
378
استضافت الإعلامية آية بدر في برنامجها الرمضاني VİP الذي يُعرض على شاشة قناة "هي" الفنانة ميس حمدان وقد صرَّحت بعدة تفاصيل عن حياتها جريئة لم تتحدث عنها من قبل أمام وسائل الإعلام والميديا.
قالت الفنانة ميس حمدان: "تعرضت للتحرش الجنسي وأنا صغيرة ومكنتش مرة واحدة.. كانت مرات كتيرة، بس اللى هوِّن عليا دلوقتي إني اكتشفت إني مش لوحدي.. طلعت البنات كلها ودي مصيبة سودة، 90% من البنات اللى انا أعرفهم اتعرضوا لتحرش جنسي من البواب والسواق وولاد الخالة والخال والعم والعمة، والفكهاني والكشك اللى علي الناصية والمدرسين وسواقين التاكسي وناس بتشتغل في محلات ودكاترة".
تصريحات ميس حمدان عن التحرش
وصرَّحت ميس حمدان قائلة : "تعرضت لمواقف تحرش جنسي كتير وإذا مكنش جسدي كان فيه لفظي، وإذا مكنش تحسيس كان لفظي، واللى انا بستغرب له جدا إني أموت واعرف ليه مكناش بنتكلم وليه كنا بنخاف، وليه مكنتش بروح واقول، يمكن علشان الأهالي بيعلمونا ولكن انا دلوقتي مع بنتي اختي مي كل يوم والتاني اقول لها خللي بالك ولو حد عمل لك حاجة إجري وصوتي واوعى تسكتي".
كما كشفت الفنانة ميس حمدان، تفاصيل ترشُحها لبطولة فيلم ويجا للمخرج خالد يوسف، بدلًا من الفنانة دوللي شاهين، مُشيرة إلى أنها وقع خلاف كبير بينها وبين خالد يوسف بعد رفضها تقديم مشاهد القبلات بالفيلم.
وأكملت قائلة: "خالد يوسف ممكن زمان كان في موقف حصل هو حمقي شوية في ردود أفعاله، هو كان عايزني في الدور بتاع دوللي شاهين في فيلم ويجا، وروحت المكتب بتاعه وكان في هاني سلامة، وكان بيقنعني بالدور وأنا ساعتها كان عندي تمسك فظيع إني مش هقدر أمثل مشاهد القبلات والمشاهد الساخنة في الفيلم، وكان بيقولي إنتي كده مش فنانة وبطلوا الطريقة دي، وأنتوا اللي بوظتوا الفن وزمان الفنانين مكانوا بيفكروا بالطريقة دي وكانوا محترمين برضوا".
وتابعت:"وهو ليه وجهة نظر وتُحترم، وأنا حسيت إني بتحط في زاوية قولتله طيب إديني فرصة أروح البيت أسأل ماما وأنا مكنش عندي الجرأة أعمل المشاهد دي، واعتذرت وقولتله أنا مش هقدر أعمل الدور ده، وزعل وهزقني وقالي بما معناه اللي زيي اللي بوظ الشغلانة".