حورية فرغلي: محمد صلاح رقم واحد وندمت على هذه الأعمال

علقت الفنانة حورية فرغلي على عدد من القضايا الفنية والشخصية، حيث تحدثت عن أزمة أحمد السقا، وعلاقتها بمحمد رمضان، إلى جانب كواليس بعض أعمالها ومعاناتها الصحية.

تعليق حورية فرغلي على فيديو أحمد السقا 

وقالت حورية فرغلي عن الجدل المثار حول أزمة الفنان أحمد السقا بسبب فيديو محمد صلاح، خلال مداخلة هاتفية ببرنامج تفاصيل مع الإعلامية نهال طايل عبر قناة صدى البلد 2: “دخل من هنا وطلع من هنا يا سقا، كلنا عارفين محمد صلاح، مش لازم نتكلم ونقول إحنا كلنا محمد صلاح، وياريت منقعدش نبص لبعض، أنا مش فاهمة ليه الناس بتتخانق، ده رقم واحد في الوطن العربي”.

وتطرقت حورية فرغلي للحديث عن علاقتها بالفنان محمد رمضان، موضحة أنها شاركته في فيلمي "قلب الأسد" و"عبده موته"، ولم تجمعهما أعمال بعد ذلك، قائلة: “رغم إني ما شاركتش بعد كده في أعمال معاه، ووقتها سألني البعض ليه ما شاركتش معاه في أي عمل، ورديت إن ما كانش فيه أي دور يناسبني”، مؤكدة سعادتها بما وصل إليه، وأنه بالنسبة لها “زميل مثل أي زميل آخر”.

وكشفت حورية فرغلي عن ندمها الشديد على مشاركتها في فيلم "استدعاء ولي عمرو"، مشيرة إلى أنها لن تكرر الأدوار التي قدمتها بعد "قلب الأسد" و"عبده موته"، وقالت: “ساعتها كان فيه مشاكل في البلد وضرب وحاجات كتير، وما كنتش ببص لنفسي خالص.. الفيلم ده اتفرجت عليه من شهرين، وقمت كنت عايزة أضرب نفسي مليون جزمة إني عملته، لأن مناخيري كانت بايظة خالص وشكلي كان وحش جدًا، فقلت إزاي وافقت أطلع قدام الكاميرا بالمنظر ده؟ أنا بسيب نفسي للمخرج والماكيير وهو اللي يظبطني، وما كانش ينفع يطلعوني بالشكل ده”.

معاناة حورية فرغلي الصحية

وفي سياق آخر، تحدثت حورية فرغلي عن معاناتها الصحية، مؤكدة أنها خضعت لـ27 عملية جراحية خلال 8 سنوات، موضحة: “مبقاش عندي عروق في جسمي خالص من كتر العمليات”، مشيرة إلى أن الأطباء لم يتبقى لديهم سوى عرق واحد في رقبتها لاستخدامه في التخدير.

وأضافت: “الأول كان يهمني شكلي، لكن دلوقتي مبقيتش عايزة أعمل الكلام ده خالص، أنا مش عايزة أشوف دكتور في حياتي خالص، أنا زهقت، ومبسوطة كده الحمد لله بشكلي، وبقول للناس اللي شكلي مش عاجبهم ما تبصوش ليا وبلاش تضايقوني عشان شكلي مش عاجبكم”.

كما كشفت عن تفاصيل زواجها القصير، مؤكدة أنها تزوجت لمدة ثلاثة أشهر فقط ثم وقع الانفصال، موضحة: “وقتها اتعرفنا على بعض وكان حد محترم جدًا ومكانش لعبي خالص، لكن متوفقناش في حياتنا، وأنا شخصية مش عصبية”.

واختتمت حورية فرغلي حديثها بالتأكيد على أن حياتها تغيرت بنسبة 180 درجة بعد فيلم "كلمني شكرًا"، لافتة إلى أنها تدعو الله في يوم عرفة من كل عام أن يقف بجوارها، وقالت: “مكنتش أعرف إن الشهرة وحشة قوي، وكنت فاكرة إنها حاجة حلوة، والمصيبة دلوقتي إن أي حد بقى عايز يتشهر، بس مش بالطريقة الصح، وفيه ناس دلوقتي بتذبح عيالها عشان يتشهروا، ودي حاجات غريبة بتحصل”.

للمزيد حول حوريه فرغلي اضغط هنا