أطلق رواد موقع التدوينات القصيرة "تويتر" هاشتاج " إزاي تطفشي العريس"، تصدر قائمة الأكثر تداولاً متجاوزًا 40 ألف تغريدة، تحكى عن أفضل الأساليب والطرق الحديثة والمبتكرة ورسائل الشر من الفتيات لتطفيش العرسان، وردود الشباب على تلك الرسائل.
أفكار عديدة مميزة وتقليدية ابتكرتها الفتيات للهروب من الجواز، تنوعت الآراء بين هذا وذاك، حيث قالت مروة البحيري: "طلعيله القهوة من غير سكر، طلعيله المياه فيها ملح، اطلعيه بأشيك بيجامة عندك، الميك قلم فلوماستر للحواجب، روج أحمر بس"، وقالت سمر فؤاد: "ارفعله حاجب واحد بس، أول ما يشوفني هيحس اني مش طيقاه ويطفش هو وأمه وأبوه".
أما "ابتسام نادي" فحكت ما قام بفعله عندما تقدم لها أحد الشباب طالبًا يدها للزواج، قائلة: "مرة ولد جه هو وباباه يخطبني، بابا قالي اعملي شاي، عملت شاى من غير سكر ليهم ولبابا بسكر، أول ما داقوا الشاى ركنوه ومشيوا"، أما "حنان الشناوى" روت هي الأخرى قصة تطفيشها للشاب المتقدم لها، قائلة: "دخلت بعباية سودا وشبشب حمام ونص شعري برا الطرحة ومفيش حاجة على وشى، وبردو مصمم انه يخطبني، فى الأخر أنا قولتلهم قصير".
هاجر اقترحت اقتراح مادي يطفش العريس من أول مرة، قائلة: "سهلة.. قوليلة عايزه أيفون 7"، فيما اقترحت آية عبد الرحمن، قائلة: "كُلي توم وبصل قبل الموعد واطبخي كرنب وعدس في نفس اليوم، اقعدى احكى عن أحلامك في قصر الأمير"، وقالت نور الطويل: "لو جاب معاه جاتوه أو شوكولاتة تقوليله العلبة دي فيها اية يابا، ولو مش جايب تقوليله انت داخلي فاضي وجايب أمك كمان".
على الجانب الآخر من الفتيات كانت هناك أراء رافضة لفكرة تطفيش العريس، منها "نورهان شوقى" الذى قالت: "هي في عرسان اليومين دول وأنا معرفش، جواز إيه يابيه، إحنا بنتشعلق في رضا ربنا"، وقالت شيري: "هو لو مش مناسب ليكي يكفي انك ترفضي، مش محتاجة انك تخططى تطفشيه ازاي"، وقالت ريمو: "الموضوع أبسط من كدا بكتير، أنا مش موافقة وخلاص".
أما الشباب المشاركين في الهاشتاج، فكانت ردودهم تعكس هجوما على فكرة التطفيش، حيث قال محمود ناصر: "متتعبيش نفسك هو هيطفش لوحده😊، ده طبعا لأنك تستاهلي واحد أحسن منه يقدر يواكب سعر الدولار بالنسبة للجنية"، وقال محمد يسري: "حضرتك هما لاقين عرسان عشان يطفشوهم، دول ما بيصدقوا واحد يجيب شبكة".
أما محمد إبراهيم فقال: "استهبال أوي بقى، هو حد لاقي عرسان أصلا في الأسعار دي، الجواز بقى بيتكلف الضعفين تقريبا احمدي ربنا"، وقال محمود شقير: "هما حلين بس، أولا شيلي طبقة المكياچ واتكلمي زى مبتكلمى صحابك، لو عجبك الوضع يبقى عليكى وعلى الحل التانى، انك تطلبى الشبكة دهب".
