لو ام جديدة في حاجات لازم تعرفيها عن الرضع قبل ماتحكمي على طفلك انه مش بياكل او مش بيضحك او تخافي من بعض التغيرات، اسمعى المعلومات اللى جاية علشان تعرفى تتعاملى صح مع مولودك الجديد.
1- طفلك فى الايام الاولى ملامحه بتكون مختلفة عن شكله النهائى، يعنى في انتفاخ فى العين والوجه بشكل عام، غير ان شعره اللي بيتولد به بيتغير بعد الشهور الاولى، شكل ابنك وملامحه بتستقر بعد فترة من الولادة.
2- استنى مرور 6 اسابيع على الاقل بعد الولادة علشان يكون فى تعبيرات مختلفة من طفلك، فى الايام الاولى بس بيكتفي بالنوم والعياط وقت ما يكون محتاج حاجة، ومش معنى ده انه مش مبسوط لكن هو لسه بيتأقلم على حياته الجديدة خارج الرحم.
3- طبيعي ان يكون فى جزء لين او طري في جمجمة طفلك، على الرغم من ان الجزء ده مهم ابعدي عنه اي حاجة حادة، الا انه عادى جدًا انك تلمسيه مفيش اي ضرر من كده.
4- طفلك بيحتاج للاكل فى اول شهور تقريبًا كل 3 ساعات، لازم تتأكدى في كل مرة بيرضع فيها انه اخد كفايته لانه لازم تحافظي على وزنه في الفترة دي كويس جدًا.
5 -طبيعى انه يفقد جزء من وزنه في الاسبوع الاول من الولادة، لكن دورك هنا انك تعوضيه الوزن اللى بيفقده عن طريق الرضاعة بشكل منتظم.
