تابع الرئيس السيسي حديثة خلال المحور الثاني من مؤتمر حكاية وطن، " انا قولت يا جماعة انتوا عارفين إن مطلب العدالة الاجتماعية اللي اطلب في 2011 اتعين ما يقرب من 800إلى 900 ألف أو مليون مواطن ، الحكومة مش محتاجاهم.. الحكومة مش محتاجه دول يتعينوا ولكن كان مطلب عدالة اجتماعية".
وأضاف الرئيس السيسي "كان مطلب العدالة الاجتماعية أيضا زيادة المرتبات والحد الأدنى ولكن قولو لي لما نيجي نعمل ده يترتب عليه ايه ..علشان لما حد من حضراتكم وهو قاعد ميقوليش اين العدالة الاجتماعية في الموضوع ..قولي منين نحقق العدالة الاجتماعية الأول وإلا بقي نكون بنطلب مطالب تؤدي إلى إسقاط الدولة ... شعاراتها جميلة وبراقة ولكن في الواقع الحقيقي غير قابلة للتحقيق والتنفيذ وبالتالي تتخرب بلدنا ويبقى احنا اللي بنهدها بايدينا ..زي واحد يكون والده ظروف بسيطة ومحدودة ويقعد يقوله اديني واتصرف ..روح استلف ..مش عاوز يقف جنب أبوه ويتحمل ظروفة ، يستعر منه ويتركه كله.. احنا كده ..لأ مش كده .. وانتو اثبتو إن انتو مش كده ".
واستطرد " أنا بتكلم في رقم واحد الـ 150 مليار جنيه اللي زادت في المرتبات تحت بند العدالة الاجتماعية للمصريين .. البند ده لوحده اللي بنستلفه كل سنه علشان نحققه ونديه للناس وهنفضل نستلفة ونديه للناس .. انا امبارح قولت انتو بتسألو ليه الدين بيتراكم ويزيد لانه بيتراكم ويزيد لان انا لازم استلف علشان أدي للموظفين المرتبات .. ومفيش خيار عندي تاني .. لانه فيه ملايين الاسر عايشه على الدخل ده ..فيه 6 الى 7 ملايين موظف بيقبض من الحكومة كل شهر .. مقدرش اقولو مش هديك علشان ده بيسبب مديونية ضخمة على الدولة المصرية " .
وأضاف " اسمعوا الـ 150 مليار جنيه لو انا افترضت انهم من 5 سنين بس وانا قولت ليكم كده امبارح .. هيبقوا عليا دين بعد 5 سنين 300مليار ، علينا دين .. يعني ببساطة خالص الـ 6 سنين أو الخمس سنين اللي استلفنا فيهم 750 مليار جنيه هيبقى خدمتهم كام بعد 5 سنين منهم من كل سنة .. 6 سنين سلف 150 مليار جنيه بعد 10 سنين يبقوا 3.6 تيريلون جنيه ببساطة.
وأوضح الرئيس السيسي "عاوز تسألني الدين رايح فين أنا اقولك لان حقك انك تعرف متسألنيش تقولي انت هتديني ايه .. قولي احنا رايحين فين .. قولي بأمانة وإخلاص بشرف احنا رايحين فين .. تاني بقولكم أهو الـ 150 مليار جنيه بعد 5 سنين هيبقوا عليكم 300مليار جنييه يا مصريين بعد 5 سنين تانيين هيبقوا 600 مليار جنيه يا مصريين .. طب لو الكلام ده بقى عملناه في 10 سنين استلفنا يبقى انت بتتكلم في تريليونيات كتير " .
