عشان توصلي لبشرة نضرة ومثالية وخالية من اي عيوب زي نجمات هوليود، ده مش بيعتمد بس على منتجات العناية بالبشرة او الماسكات الطبيعية، لكن كمان على التغذية وكل حاجة بتدخل لجسمك.
مشروبات هتحافظ علي بشرتك
زي ما دايما بنقول ان جمال البشرة يبدأ من جوه قبل بره، عشان كده اي حاجة بتدخل جسمنا بتأثر على بشرتنا، والقايمة اللي معانا النهاردة هي من المشروبات الغنية بالعناصر اللي محتاجاها البشرة عشان يكون ليها تأثير كبير على توهج ونضارة بشرتك.
قائمة مشروبات هتحافظ علي بشرتك نضرة وصحية:
1- المية:
مافيش حاجة هتخلي البشرة ناعمة ونضرة زي المية، بتساعد على الحفاظ على توازن البشرة، وعلى المرونة المثالية للجلد، وده في النهاية بيديها المظهر الصحي.
2- العصير الاخضر وحليب الصويا:
العصير الاخضر مع الكالي: نبات الكالي هو نوع من انواع الكرنب الغني جدا بالفيتامينات المفيدة للبشرة، بيحتوي على فيتامين A “اللي موجود تقريبا في كل الكريمات المضادة للشيخوخة زي الريتينول” بيساعد على تعزيز نمو الخلايا والتخلص من الخلايا القديمة، والتخلص من بهتان البشرة، كمان بيحتوي على فيتامين C والنحاس واللي هي اساس الكولاجين اللي بيحافظ على البشرة شباب ونضرة، وبيخليها عندها القدرة على شفاء نفسها او معالجة نفسها بشكل صحيح وفعال.
حليب الصويا: الايسوفلافون في الصويا بيساعد على حماية الكولاجين، وزي ما قولنا ده الأساس في الحفاظ على شباب البشرة، والدراسات أظهرت كمان انه بيحمي البشرة من التجاعيد اللي بتنتج عن التعرض لأشعة الشمس، والمعادن والبروتينات اللي موجودة في حليب الصويا بتقلل اسمرار وتصبغ الجلد.
3- الشاي الاخضر:
الشاي الأخضر غني جدا بمضادات الاكسدة اللي بتساعد على حماية البشرة من الأشعة فوق البنفسجية من خلال تقليل فرص التعرض للاصابة بحروق الشمس، وزي غيره من مضادات الاكسدة بيساعد على تقليل احمرار والتهاب البشرة.
4- عصير الرمان:
عصير الرمان بيحتوي على كمية ضخمة جدا من مضادات الاكسدة والبوليفينول ضعف اللي موجود في الشاي الأخضر، ويعتبر رائع جدا لحماية الخلايا الليفية في الجلد، واللي هي تعتبر مصانع إنتاج الكولاجين للبشرة، وده معناه انه هيغذي البشرة بالكولاجين اكثر، وهيقلل اكتر من التجاعيد والخطوط الرفيعة، كمان كثافة كمية مضادات الاكسدة اللي موجودة في عصير الرمان بتحسن من لون البشرة.
5- المية الممزوجة بالخيار:
بما ان الخيار بيتكون من 90% من المية فهو بيساعد على ترطيب البشرة بشكل كبير جدا، كمان غني بالمعادن زي المغنسيوم والبوتاسيوم، اللي بتساعد على الحفاظ على درجة الحموضة القلوية للجلد وتقليل الالتهاب.
