طباعة

كشفت الفنانة رانيا يوسف عن جوانب من حياتها الشخصية بجانب الحديث عن مسيرتها الفنية وبعض المواقف التي تعرضت لها، مؤكدة أن بعض الناس تفهمها بطريقة خاطئة.

وقالت رانيا خلال لقائها في برنامج "صدى الملاعب" مع الإعلامي مصطفى الآغا، المذاع على قناة "MBC1" عن الصورة المتداولة لها: "معظم الناس بتفهمني غلط، وأنا بتكلم بصراحة ومش بحب الكذب، ودائمًا بيتم تداول كلامي بصورة غلط وبتكون نيتي طيبة ومش بفكر في شئ سئ".

وأضافت: " مش بكذب خالص مش بعرف أكذب، أنا بحب ربنا لكن مش بخاف منه وعلشان بحبه مش بحب أكذب، ومعنديش أني أخاف من البشر، هما طول الوقت عاوزني أقول اللي هما عايزين يسمعوه، بجاوب على الأسئلة من قلبي، مبعرفش أجامل ومش محتاجة أعمل كده علشان أكسب الناس وأخسر نفسي".

وتابعت: " أنا شخصية بحب الجلوس في المنزل وأحب الحياة البسيطة، أخاف من الشو، حضور المهرجانات شغلي ورزقي دا شو لازم يتعمل لكن مكنش مقصود اللي حصل كانت غلطة".

وردًا على سؤال إذا عاد الزمن ماذا ستفعل علقت: "مش هتجوز تاني ولا تالت مرة، يعني أتجوز مرة واحدة بس اللي هي الأولانية ومتجوزش تاني ولا تالت، أنا وطليقي السابق أصحاب، الجواز في حد ذاته كان صعب مع ظروف حياتي، ألغي آخر زواجين لكن احتفظ بصداقته، وكمان أحوش شوية فلوس".