هو أحد أمهر اللاعبين في فريقه، اسمه مميز ورقمه مميز، ولحبه الشديد للتميز، سجل 4 أهداف في ثالث المباريات، ليصبح أول لاعب يحرز سوبر هاتريك في تاريخ أول نسخة من بطولة الدوري المصري لذوي الساق الواحدة ، هو زاهر شبل لاعب نادي بيراميدز صاحب القميص رقم 10.
هدفه الأساسي هو إهداء نادي بيراميدز أول بطولة دوري مصري للاعبين مبتوري الأطراف في دوري الساق الواحدة ، تقديرًا لما قدموه له خلال الفترة الماضية وحتى الآن، وحلمه الاحتراف في الدوري الإنجليزي وارتداء قميص نادي مانشستر سيتي.
«بوابة المواطن» تحاور هداف دوري الساق الواحدة
حاورت "بوابة المواطن الإخبارية" هداف الدوري المصري لذوي الساق الواحدة ، ابن مركز سنتريس بمحافظة المنوفية في حوار خاص وحصري، وإليكم تفاصيل الحوار:
- نبارك لك أول سوبر هاتريك في تاريخ البطولة.
الله يبارك فيكم، شكرًا جزيلًا على تواجدكم معانا ومساندتكم ودعمكم لينا.
- كيف تستعدوا وتجهزوا للمباريات؟.
الحمد لله، ربنا بيكافئنا كويس جدًا، إحنا بنتمرن كتير وبقوة وبنتعب أوي وبنشتغل على نفسنا وعلى تصحيح أخطائنا كلاعبين عشان نوصل للي إحنا فيه ده.
ومعانا مدرب كبير أوي هو كابتن محمد رستم اللي بيتعب معانا جدًا وبيتطور مستوياتنا وبيصلح لينا أخطائنا.
والحمد لله ربنا بيكافئه كمدرب وكلنا كفريق بتصدر البطولة بالعلامة الكاملة وبيكافئني شخصيًا بالسوبر هاتريك.
- شاهدنا فرحة هيستيرية من زملائك اللاعبين بأهدافك، أوصف لنا هذه الحالة؟.
إحنا بره الكرة أصحاب وإخوات، الحمد لله ربنا مدينا الحتة دي، إننا بنحب بعض بره الكورة.
ومبدأنا الأساسي إننا نحقق نتيجة كويسة والفريق يكسب، وهدفنا الأهم إننا نحقق أول بطولة دوري لينا ولنادي بيراميدز، ومش نفوز بالدوري بس، لكن نكسبه بالعلامة الكاملة ونفوز بكل الماتشات.
وكل الماتشات بالنسبة لينا ماتشات كؤوس، عايزين نحقق اللقب بأرقام تاريخية، الأهم بالنسبة لينا هو تحقيق الفوز ومش مهم مين يسجل الأهداف، بالتالي هتلاقي حالة الفرح وحالة الحب اللي شوفتها دي موجودة مع أي حد بيسجل هدف لفريق بيراميدز.
- إزاي بتحضروا وتجهزوا نفسكم للمباريات؟.
التحضير للماتشات بيبدأ من قبل أول تمرين بعد الماتش، لما كابتن رستم المدير الفني بيتفرج على الماتشات وبعد كده بيبدأ يحلل الماتش وأداءنا ويتكلم معانا على الإيجابيات والسلبيات اللي حصلت.
وبعد كده بنتمرن مرتين يوميًا، بيوظف فيهم اللاعيبة طبقًا للفريق المنافس وبنشتغل على التحركات، بيشوف اللاعب المميز في الفريق الثاني ومين هيمسكه وإزاي نقدر نوقفه؟، إزاي نتعامل في حالة تسجيل أو استقبال أهداف؟، لحد قبل الماتش بيوم، بناخد راحة وبعدها بنروح نلعب الماتش.
وبنحاول نطبق كل اللي قاله كابتن رستم، والحمد لله هو شخصية قوية جدًا على مستوى الإدارة والفنيات واستفدنا من وجوده جدًا.
وكابتن رستم بيقدر يحلل أداء المنافسين بشكل قوي، وبنشوف ده في المحاضرات والتمارين، وبنشتغل على نقاط قوة وضعف الفرق التانية، وبنبني خطة الماتش على جزئين، جزء مرتبط بفريقنا وجزء تاني مرتبط بالمنافس، وبيبقى عندنا اختيارات بلان A وبلان B وبلان C تحسبًا لأي حاجة تحصل في الماتش، الخلاصة إننا بنشتغل بشكل كويس وقوي جدًا مع كابتن رستم.
- ما هي طموحاتك وأهدافك مع الفريق؟
طموحنا كفريق ولاعبين هو الفوز بالدوري عشان يبقى فيه عناصر قوية تنضم لقائمة منتخب مصر، عندنا بطولة أمم إفريقيا في شهر 11 هنا في مصر، نتمنى نحقق أداء كويس ونتائج تليق بينا ونفوز بالبطولة، إحنا مش أقل من حد.
أما بالنسبة لطموحي للبطولة، طبعًا بتمنى زيادة عدد الأندية، وإننا بدل 4 فرق نبقى 10 وأكتر، وطبعًا أنا بتشرف بانتمائي لنادي بيراميدز، أول نادي آمن بفكرتنا، أول نادي فتح لنا أبوابه، أول نادي أعطى لنا كل الدعم والمساندة عشان نوصل للي إحنا فيه حاليًا من كل المستويات وأهمها إعلاميًا.
وبصراحة إدارة بيراميدز تسخر كل الإمكانيات لينا عشان نبقى أفضل فريق، إحنا مكملين معاهم إن شاء الله وعايزين نكسب أول بطولة دوري عشان تبقى بمثابة رسالة شكر ليهم على كل حاجة.
أما بالنسبة لمنتخب مصر، نتمنى إن البطولة تفيدنا وتخرج لنا عناصر جديدة وقوية تزود احتكاكنا وتفيدنا على كل المستويات سواء فنيًا أو بدنيًا.
- أيه الفرق بين الدوري في مصر وخارج مصر؟
دوري ذوي الساق الواحدة موجود بره بأربع درجات، والدوري الممتاز في إفريقيا وأوروبا بيوصل ل15 و17 فريق، وبالتالي هتلاقي المنتخبات التانية مستعدة بشكل أفضل وبلغتنا كده واقفة على رجليها.
على العكس هنا مكنش فيه بطولة، لكن إحنا عندنا لاعبين جيدين أثبتوا إنهم يقدروا يقدموا حاجة لنفسهم ولبلدهم.
إحنا سافرنا بطولة أمم إفريقيا وإحنا معندناش أي احتكاك دولي ولا عندنا بطولة دوري، كنا بنتمرن بس، ورغم كده حققنا المركز السابع، وعملنا مباراة قوية جدًا مع منتخب أنجولا بطل العالم في ربع النهائي وقدرنا نكون ند قوي جدًا ليهم لكننا خسرنا بركلات الترجيح بعد التعادل.
عندنا لاعبين محتاجين الفرصة وهتشوفوا حاجات قوية جدًا، وأعتقد إقامة بطولة للدوري هيفرق معانا جدًا، وإن شاء الله في طريقنا لتحقيق بطولات قارية وعالمية قريبًا.
- بتحلم بأيه، وهل الاحتراف من أهدافك؟.
أتمنى الاحتراف، وهدفي الأول إني أحقق بطولة الدوري مع نادي بيراميدز عشان نقول لمجلس الإدارة شكرًا ليكم إنكم دعمتونا وساندوتنا وآمنتم بينا وبفكرتنا وفتحتوا لنا كل الأبواب عشان نحقق كل اللي نفسنا فيه، وأقل رد لكل ده إننا نكسب بطولة الدوري.
حلم الاحتراف، ده حلم مشروع لأي لاعب، وحلمي إني في يوم ألعب بقميص مانشستر سيتي الإنجليزي، بس الأول أرد جميل نادي بيراميدز، وأعطيهم حقهم بالفوز بأول بطولة دوري.
- بتحب مين من لاعبي الدوري المصري، ومين هو اللاعب اللي يشبهلك؟.
بحب عبد الله السعيد لاعب بيراميدز من زمان جدًا، وكمان حسين الشحات لاعب الأهلي، بحب طريقة لاعبه وإسلوبه كلاعب طرف وأنا بلعب طرف برضو، وجسمنا متشابه وصغير زي بعض، بحب الشخصية دي جدًا.
ويتصدر نادي بيراميدز جدول ترتيب فرق الدوري المصري لذوي الساق الواحدة بالعلامة الكاملة برصيد 9 نقاط بعد الفوز على المقاولون العرب بخماسية مقابل هدف ثم الزمالك بهدف نظيف وأخيرًا زد بثمانية أهداف مقابل هدف.
فيما يتواجد زاهر شبل على صدارة قائمة الهدافين برصيد 5 أهداف بالتساوي مع زميله في فريق بيراميدز مصطفى محمود.
