أعرب الفنان أحمد زاهر عن غضبه من إحدى المصادر داخل مهرجان القاهرة السينمائي الدولي الذي هاجم وكشف عن أسماء الفنانين الذين تم دعوتهم ولم يحضروا.

وقال "زاهر": "طيب بما إن المصدر بيسيح وبيفضح الفنانين اللي ما راحوش فمن حقي أني أدافع عن نفسي، أولا أنا كان عندي تصوير في نفس اليوم في ديكوري، ومفيش مشهد من غيري في أستوديو المغربي، وبيتهيألي تقدروا تتأكدوا من ده، حاولت أأجله معرفتش طب أعمل إيه"

وتابع: "ثانيا بصراحة مش مقتنع أني أكون سعيد ولابس ومتشيك وبضحك قدام الكاميرات والناس عشان مهرجان بلدي، وأنا أصلًا حزين ومدمر عشان وفاة الفنان محمود عبد العزيز وتاني يوم أكون في العزاء حزين ومتأثر إيه التناقض ده، أنا معرفش أكون متناقض يعني حتى لو مكانش عندي تصوير مكنتش قدرت أروح لأني ما بعرفش أكون متناقض، وأكيد زملائي كان عندهم ظروف برضه، لأن أكيد نتمني جميعا الحضور وتدعيم مهرجان بلدنا".

وأضاف: "وعلى فكره أنا مش بلوم أي حد من زمايلي اللي راحوا المهرجان، ما هو لازم ناس تروح وتدعم المهرجان، وتكون عندها القدرة على إنها تفصل، ولكن أنا بتكلم عن نفسي أنا اللي مقدرش، هي قدرات وللأسف القدرة دي مش عندي، وعمومًا ألف مبروك لافتتاح مهرجان بلدي، وأتمني له كل النجاح والتوفيق والازدهار".