الإحساس بالقلق والخوف هو رد فعل طبيعي وذو فائدة في المواقف التي تواجه الإنسان بتحديات جديدة ويعتبر دلوقتي من المشاكل الصحية العقلية اللي منتشرة بشكل كبير جدا على مستوى العالم، وتفضلي تفكري يا ترى ايه اللي هيحصل بكره؟ وازاي اقدر اتغلب على المشاكل دي؟ وده اكيد بيخليكي صعب تنامي وبيأثر عليكي صحيا بشكل سلبي.

لذلك تقدم "بوابة المواطن" طرق توقفي بيهم نوبات القلق بشكل فعال جدا..

1- كافحي الأفكار التي تسبب لك القلق:

لازم نعرف ان القلق بيتغذى على نفسه يعني لو سمحتي للافكار السلبية انها تكبر في عقلك وتتراكم فكرة ورا التانية هينتهي بيكي الامر للجنون، يعني اول ما تحسي انك بدأتي تفكري اسألي نفسك كده هل الموضوع مستاهل ياخد كل التفكير والقلق ده كله منك؟ ووقفي التفكير عن الماضي والمستقبل وخليكي في الوقت الحاضر اللي انتي عايشة فيه، وحاولي تتصوري حياتك كده هيبقى شكلها ايه من غير مخاوف ولا قلق.

2- التأمل والتنفس:

التأمل يعتبر من اكتر الطرق المنتشرة والفعالة جدا للتخلص من نوبات القلق، لو مارستي التأمل بانتظام بشكل يومي هيساعد في تقليل التوتر والقلق، وايضا كمان تقدري تمارسي التنفس في اي مكان واي وقت اول ما تحسي انك تحت ضغط او قلقانة، ممكن تغمضي عينك وتاخدي اكتر من نفس ورا بعض ببطء، هتلاقي عقلك وجسمك اتحسنوا جدا.

3- اطلقي المواد الكيميائية المفيدة للمخ:

مجرد ما بتمارسي رياضة وجسمك بيبقى في حالة حركة، بيبدأ الجسم يطلق الاندروفين والسيروتونين ودي الانزيمات اللي موجودة في المخ ومرتبطة بمشاعر السعادة والمتعة، لانها بتساعد على تسخين الجسم كله وبتخفف من التوتر في العضلات.

4- العلاجات العشبية:

جربي العلاجات العشبية الطبيعية اللي بتساعد على الاسترخاء وبتخفف من التوتر، زي شاي البابونج شاي اللافندر او الخزامي، النعناع، الزنجبيل، هتساعدك جدا على تخفيف القلق والتوتر والعصبية وتخليكي تنامي بشكل اسرع وافضل بكتير.