تصدرت الفنانة "يسرا اللوزي" محركات بحث "جوجل" خلال الساعات القليلة الماضية، بعد تعرضها للتنمر من قبل أحد المتابعين على موقع التواصل الإجتماعي "إنستجرام"، ليصفها أحد المتابعين بـ "أم الطرشة".

وعلقت "يسرا" :"عملت بوست توعية لسرطان الثدي وده كان أحد التعليقات.. حبيت أعرفكم بس إني مش هرد خالص هسيبلكم الموضوع ده وشكرًا".

وقررت "يسرا" أن تلقي صاحب الكومنت درسًا لن ينساه فقالت له :" شكرًا على ذوق حضرتك.. أنا قررت استغل كلامك اللطيف عشان أقدم شوية توعية بخصوص هذا المصطلح، أولًا، المصطلح الصحيح والمقبول هو الصم وضعاف السمع، وليس الطرش أو البكم، ثانيًا، أحب أعبر عن فخري بكوني والدة طفلة صماء لأنها علمتني حاجات كتيرة جدًا وبقيت بني آدمة وبقيت أم أحسن بسببها، وأنا متأكدة إنها هتطلع إنسانة مثقفة ومتفوقة ومش هتبقى محتاجة حد عشان تحقق أحلامها".

وتابعت :"ثالثًا، البنت الصماء دي هي اللي ألهمتني إني أتكلم في البرامج وأطالب بالكشف المبكر للمواليد اللي على أساسه كل المصريين هيتعملهم كشف سمع عند الولادة، وده المفروض يساهم بشكل إيجابي في حياة عائلات كتير وهيسمح للأطفال الصم وضعاف السمع إنهم يلاقوا الدعم منذ الصغر عشان يقدروا يتعلموا كويس وما يبقوش عبء على حد، بل بالعكس هيكونوا قادرين يندمجوا في المجتمع المريض للأسف، فبالتالي الطفلة الصماء دي ليها إنجازات أثرت على شعب كامل رغم إن عمرها 6 سنين، ياريت توضحلي بقى حضرتك أنجزت إيه في حياتك؟ شكرًا".

تعليق النجوم لـ"يسرا" بعد تعرضها للتنمر

قالت الفنانة "كندة علوش" :"أستغفر الله العظيم مش عارفة ده سواد ولا مرض ولا إيه اللي يخلي حد يفكر أو يكتب كده"، في حين علقت الفنانة "هدى المفتي" :"أستغفر الله العظيم، متزعليش نفسك أمراض نفسية"

وطالبت الفنانة "بسنت شوقي" بتقديم بلاغ في هذا الشخص ليتلقى حسابة قائلة :"لازم يتبلغ عنه"، في حين قالت الفنانة "علا رشدي" :"ناس مريضة وربنا عاميهم، فقط تنفسي وأرسل لكي الحب والقوة".