تحدث الفنان أحمد أمين في برنامج صاحبة السعادة الذي تقدمه الفنانة والإعلامية إسعاد يونس على فضائية dmc عن كتاباته لمسلسلات الرسوم المتحركة مثل بسنت ودياسطي.

أحمد أمين في صاحبة السعادة
وقال أحمد أمين في صاحبة السعادة : « تركت المسرح واتجهت لصحافة الأطفال لأنها مكس بين الرسم والكتابة، وفي الوقت دة كنت بكتب رسوم متحركة مسلسلات أنيميشن، كوكب كراكيب كان أول حاجة أكتبها وأول مسلسل 3D يتعمل على التليفزيون المصري، وبكار كان وقف وصديقي المخرج سامح مصطفى حد موهوب جدًا وهو كان صاحب الفكرة وهو اللي أبدع الشخصيات دي».

وأضاف: « قالي سامح مصطفى عايز اكتب سيناريو، وهو رسمها بس وكتبتها وعملها أشرف عبد الباقي وأحمد رزق ونجحت جدًا، وبعدها بسنة عملنا شخصيتين كدة اخترعناهم اتنين صعايدة بيتكلموا على الإنترنت بس وكان دمهم خفيف جدًا وصلاح عبد الله وحنان ترك عملوا حاجة خطيرة ساعتها، لما شافوها على التليفزيون المصري اتبسطوا جدًا كانت بداية NTN لسة والقنوات المتخصصة كان في صحوة كدة حصلت في الوقت دة ».

وأوضح أحمد أمين في صاحبة السعادة : « قنوات النيل المتخصصة تحمست قوي وقالوا عايزين الحلقات دي تبقى طويلة، وهما كانو بيتكلموا مع بعض دقيقتين تلاتة، قررنا نجوزهم قعدنا كدة على القهوة جوزنا الشخصيتين بسنت اتجوزت دياسطي وبقى في عالم بتاعهم كدة اللي هو كفر أبو عجوة وانضم سامح حسين ويوسف عيد الله يرحمه وبعدها إنعام سالوسة».

وأشار: « عملنا انا وسامح حسين شركة إنتاج وأنتجنا القبطان عزوز وكتبت الموسم الأول وكان أول مرة يبقى فيه cut out وهو انك بتصوري الممثل في أوضاع كتير جدًا ونبتدي نحرك صورة صورة ورا بعض 24 صورة في الثانية بدل ما تترسم تبقى بالصور ودي كانت فكرة جديدة متعملتش واحنا طلعناها وقتها، دة بقى وصلنا لـ30 ثانية وانا لما شتغلت في مجلة باسم صحافة الأطفال فترة، كنت طول الوقت حاسس ان في حاجة غلط، سيبت المسرح وبشتغل صحفي ورئيس تحرير» .

اقرأ أيضا: أحمد أمين ضيف «صاحبة السعادة» في هذا الموعد