أعربت الفنانة نيللي ، عن سعادتها باحتفال برنامج «الستات ميعرفوش يكدبوا»، بذكرى ميلادها، لافتةً إلى حبها الشديد للفنانة دنيا سمير غانم، وقدرتها على تقديم فوازير نظراً لموهوبتها.

وقالت الفنانة نيللي، عبر مداخلة هاتفية في برنامج «الستات ما يعرفوش يكدبوا»، مع الإعلاميتان منى عبد الغني وإيمان عز الدين، على قناة «سي بي سي»: «أنا بأشكركم جدًا وبحبكم قوي على أنكم افتكرتوني، أنا بشوفكم كل يوم».

وأشارت نيللي، إلى أكثر الأعمال التي تحبها قائلة، «أنا دايمًا فاكرة فيلم العذاب امرأة، لأني أنا وقتها اللي صممت أختار الدور اللي قدمته، وقتها كان في دورين وقررت أختار دور السيدة الشريرة ورفضت تقديم الدور اللي له مساحة أكبر وعملت شخصية الست اللى مش طيبة».

ووجهت، نصيحة للسيدات قائلة: «بقول لكل الستات لازم نسامح، التسامح بيحقق رضا النفس، والرضا هيخلق السعادة، واننا منبصش للحاجات الوحشة ونبص للحاجات الحلوة عشان نكون سعداء في حياتنا».

وعبرت نيللي، عن رأيها في الممثلين والممثلات من الجيل الجديد، معلقة: «أنا بحب الجديد دايمًا، لأنه حاجة بتدي أمل في الحياة، وبحب دنيا سمير غانم جدًا، وهى تقدر تقدم الفوازير لأنها موهوبة».

وردًا على سؤال ما الدور الذي تحلم بتقديمه قالت: «يا بخت من زار وخفف، والله أنا عملت كل حاجة واستمتعت كثيرًا بأدواري اللي قدمتها، أنا بحب الشخصية الفرعونية وكنت أحب أقدمها عشان رقبتي طويلة زي رقبتها، وأنا بحب نفرتيتي وحاطه صورتها عندي».