خيال علمي ولا حقيقة.. مؤلف مسلسل كارثة طبيعية يوضح الحقيقة

تستعد منصة WATCH IT الرقمية لعرض أحدث إنتاجاتها الأصلية مسلسل كارثة طبيعية، وهو من بطولة محمد سلام.

وكشف أحمد عاطف فياض مؤلف مسلسل كارثة طبيعية عن بعض التفاصيل الخاصة بالعمل.

تفاصيل مسلسل كارثة طبيعية 

وكتب عبر حسابه الشخصي على موقع التواصل الاجتماعي فيسبوك منشور، موضحًا أن مسلسل كارثة طبيعية مكون من 10 حلقات، وسيتم عرض حلقتين كل يوم أربعاء بداية من الأربعاء القادم بإذن الله على منصة WATCH IT.

وأضاف: "كارثة طبيعية مش مسلسل خيال علمي ولا حدث خارق للطبيعة، هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تماماً، والحدث ده ممكن يحصل لأي حد عادي، وهي إن الزوجة بتحمل في 5 أطفال مرة واحدة كحالة توائم متعددة. ودي حالة حصلت كتير بالمناسبة في مصر والعالم كله".

وأكد: "والرقم القياسي المتسجل في مصر لحالات التوائم المتعددة هي ست جابت 9 أطفال في بطن واحدة، واستضافها عمرو الليثي واللقاء موجود على اليوتيوب بس محدش يتفرج عشان مانكسبهوش أرباح".

وتابع: "نوع المسلسل بلاك كوميدي / دراما".

أما عن التساؤلات المتكررة حول وجود جزء ثاني من مسلسل بالطو، فقال: "مبسوط طبعاً جداً إنكوا بعد سنتين ونص تقريباً لسه بتسألونى على بالطو 2 فى كل مناسبة، بس الحقيقة أنا مش عارف مين قال إن فيه بالطو 2، بالنسبالي قصة دكتور عاطف خلصت، وماكنتش حابب فكرة إني أكتب جزء تاني لمجرد استغلال نجاح الجزء الأول بدون ما يكون فيه حاجة معينة عايزين نقولها من المسلسل"، مشيرًا: "وده مكنش رأيي لوحدى، لأ، كان رأى منصة واتشت بردو اللى كانت مقتنعة بنفس وجهة النظر، وكذلك أصدقائي الأعزاء عصام عمر وعمر المهندس كانوا بيفكروا بنفس الطريقة وده نفس رأيهم".

واستكمل: "أيوة اللي شوفتوه ف البرومو صح، الأستاذ كمال أبو رية معانا في المسلسل وبقينا أصدقاء جداً، اعترفتله فى أواخر تصوير المسلسل على حوار إن أنا اللي أكتشفت مسلسل عزمي وأشجان بتاعه هو وفيفي عبده وفضحته، بس ده محتاجله بوست منفصل هبقى أحكيلكوا قالي إيه، خلونا في كارثة طبيعية دلوقتي".

وأشار إلى أن موعد عرض أولى الحلقات سيكون قريبًا، موضحًا: "أول حلقتين بعد بكرة الساعة 10 صباحاً، يعني تصحوا بدري متكدرين تفطروا تلاقوا الحلقات موجودة، أظن مفيش دلع أسوأ من كده".

واختتم: "وفي النهاية أتمنى المسلسل يعجبكوا إن شاء الله، ومستني بجد الفيدباك بتاعكو على الوحش قبل الحلو فى المسلسل".

للمزيد حول مسلسل كارثة طبيعية اضغط هنا