بعد تعرضه لحادث.. أول ظهور لـ أحمد سعد مع ريم مصطفى
قام المطرب أحمد سعد بإحياء حفل زفاف نجل الفنانة ريم مصطفى، ويعد ذلك أول ظهور له بعد تعرضه لحادث سير على طريق العين السخنة منذ أيام نقل على إثره ومكوثه فى أحد المستشفيات لعدة أيام.
وظهر أحمد سعد وهو يبدو عليه ملامح الإعياء والإرهاب نتيجة الإصابات التي تعرض لها بسبب الحادث، وكان حفل الزفاف في جو عائلي يقتصر على الأهل والأصدقاء.
أول تعليق من أحمد سعد بعد تعرضه للحادث
ونشر أحمد سعد مقطع فيديو من داخل المستشفى يطمئن الجمهور على حالته الصحية عبر حسابه الشخصي على موقع تبادل الصور والفيديوهات إنستجرام، وقال فيه: “أحب أطمن كل جمهوري الحبيب وأقولكم ألف شكر، ألف مليون شكر إنكم سألتوا عليا، عايز أقولكم الحمدلله أنا بخير، في نعمة كبيرة جدًا من ربنا، متبصوش للوحش.. بصوا للحلو، والوحش والحلو كلهم فيهم الحمد لله سبحانه وتعالى على أن أنا موجود”.
وأضاف: "شفت حب كبير من كل الناس والحمد لله أنا بخير وطلعت بأقل الأضرار، وإن شاء الله مش أكتر من خمس أيام وهكون موجود مع جمهوري وفي حفلاتي وأكون مع الناس، لأن أنا بعيش بحب الناس والناس بتستمتع بصوتي، إن شاء الله أكون معاكم دايمًا.. شكرًا جدًا".
حالة أحمد سعد الصحية
قال أحمد سعد خلال مداخلة هاتفية عبر برنامج الحكاية الذي يقدمه عمرو أديب والمذاع عبر قناة MBC مصر: "يعني عشان أنا تعبان وقاعد في المستشفى تجيبوا رامي صبري، وأنا والله مبحبش أطمن الدنيا غير من عندك ومبحبش افرح غير من عندك وكل حاجة من عندك بتبقى احلى حاجة والله".
وتابع: “والله العظيم الحمد لله في نعمة والنعمة الأكبر بكتير هي حب الناس اللي شوفته ساعة لما حصل الحادث.. عملت إيه في حياتي علشان أشوف كل الحب ده والله العظيم بجد”.
وأضاف: “وبشكر كل الناس اللي هما حبايبي وصحابي وجمهوري وكل الناس اللي وقفت جنبي وقالت كلام حلو وأنا سعيد جداً ويعني الناس بتبان حقيقتهم في الشدة، الشدة بتعرف الناس بتعرف الناس وشكرًا لكل الناس”.
أحمد سعد يطمئن جمهوره
وأوضح: “الدكاترة طمنوني وبتقول أن انا المفروض كمان أقعد خمسة أيام في المستشفى، بس أنا بقول يومين وانت عارف الواحد دكتور نفسه، بس كل الحفلات والأفراح اتأجلت لأني عندي مشكلة في المشي مش بقدر أمشي”.
وعلق عمرو أديب مازحًا: “وإنت محتاج في الفرح ليه للمشي؟ يجيبولك كرسي واقعد غني أوعى تسيب رزقك يا احمد ده أنت شغال نار”.
فرد أحمد سعد: “هما دول اللي نيموني مكاني من الكلمتين الحلوين دول”.
ثم قال: “أنا من خلالك عايز أطمن الناس إن أنا الحمد لله كويس وفي صحة جميلة وفي نعمة كبيرة اوي، منبصش على الحاجة الوحشة أن حصلي حادثة، نبص إنّي طلعت منها كويس الحمد لله، ربنا فداني وخلاني في نعمة وبذكر ربنا وبحمد ربنا من ساعة الحادثة لحد دلوقتي”.
واستكمل: “وبقول للجمهور أنا موجود وهكون موجود يوم الجمعة الجاية هيكون عندي حفلة، اينعم مش هتنطط بس هيكون عندي حفلة وهشوف الناس، وبكرة الشغل بتاعي هيبقى نازل وكل حاجة تمام وأنا الحمد لله بخير”.
واختتم: “وأنا هسمع كلام الدكاترة، وموضوع الكسر اللي في الفقرات مش محتاج تدخل جراحي ولكن محتاج راحة تامة فأنا هعمل كده إن شاء الله”.
للمزيد حول أحمد سعد اضغط هنا