لم يكن في مخيلته، أن يصبح مصورًا فوتوغرافيًا في سن مبكر، لكن حبه للتميز جعله يواصل مشواره، الذي بدأ في الصف الثالث الابتدائي، عندما صمم والده على إزالة برنامج الـpaint، نظرًا لاقتراب الامتحانات، في ذلك الوقت، فقد كان مولعًا باستخدامه: "لما بابا مسح برنامج الـpaint، نزلت برنامج الفوتوشوب، غلط وقررت أتعلمه وبدأت أتعامل معاه وأعلم نفسي".

بدأ مارك إبراهيم، الطالب بكلية الفنون التطبيقية رحلة عمله من خلال موقع التواصل الاجتماعي فيس بوك: " بدأت أعمل Design لكذا بيدج على الفيس وكان منها صفحة للكابتن محمد بركات، ولسه صورة الغلاف موجودة لحد الآن وبدأت أشتغل بفلوس، كنت وقتها في أولى ثانوي، وكان صعب عليا أتعلم برامج الـvideo وphoto وdesign ".

ويضيف الشاب العشريني: " دلوقتي فتحت شركة دعاية في الزمالك ومعايا فيها فريق وبنعمل كل ما يخص الدعاية سواء فيديو أو رسم، ولما دخلت الجامعة، دخّلت الديكور كمان، وكان تركيزي في الأول على المناظر الطبيعية، وعندي بيدج بتاعتي على الفيس بقالها 3 سنين وبدأت أتعرف ومعايا فريق كبير كلنا بنشتغل مع بعض، والفكرة الجديدة اللي بنقدمها تخص العدد، يعني الشغل ممكن نخلصه في أي وقت، بأكبر عدد ممكن من المصورين، ممكن 32 مصور".

ويواصل مارك: "الأول كنت شغال لوحدي لكن دلوقتي بقينا مجموعة كبيرة، ومن أبرز التصميمات اللي عملتها كانت لصفحة خليل مأمون وده مشهور في مصر وألمانيا، وبدأت أدخل التصميم في الفوتوغرافي وبيطلع الشغل أحسن، وخدت جايزة أحسن مصور على مستوى الظاهر ووسط البلد ودى المسابقة الوحيدة اللي شاركت فيها، وبستخدم كاميرا واحدة بس وبغير العدسات".

رغبة "مارك"، في خلق روح في الصور التي يلتقطها جعلته يتجه لتصوير لحظات معينة في المناسبات التي يحضرها: "مش بحب أصور جو الشربات والحاجات التقليدية في الأفراح، في لحظات مختلفة بيكون فيها روح واختلاف ودي اللي بتميز المصور المبدع عن المصور العادي، ولأني بدأت بدري الشغل بقي يساعدني في الجامعة وكل حاجة سهلة بالنسبالي، والماديات والمعدات مش عوائق عندي لإني مقتنع أن الفكرة في أنك تتعب وتدور".

اتجاه مايكل لعالم الديزني جعله يبتكر أساليب جديدة في الأفراح، كان أبرزها الفرح الذي صممه على غرار عالم سندريلا: " كانت الناس لابسة نفس اللبس اللي كان أيام سندريلا ونفس العربية اللي كانت موجودة، ومن وقتها أي حاجة حد عاوز حاجة ديزني بيكلمني، وأي حد شاطر في المونتاج أو التصوير أو غيره بيشارك معانا لإني بكون حريص إن يبقى عندي كل حاجة".