إِدفِن فَقِيدَك يا غراب
في مكان مايعرفهوش قابيل
إنتَ اللي مات لك مش قتيل
سيب ابن آدم يعرف ان القتل قتل
بعديها طير عند النبي الأوَل
واستنى ييجي صاحبنا شايل فوق كتافه المعصية
واشهد بإنك شفته قاتل نُص مخاليق ربنا
من أول الأخ اللي قتله بالدراع
للقتل ع الأهلية والأتباع
للقتل ع البترول
للحرب ع الثوار و ع التغيير
ولحد آخر شخص مات إهمال في حادثة سير
واهو تبقى واخد بونط عند الأنبيا.. للطير
وساعتها لما يشِذ هدهد عن وظيفته وينقل الخبر المُبين
مايخافش إسمه يتكتب في "الغائبين"
.
ويا ديب يا صاحبي
لو صحيح ما أكلتش الطفل الرسول
إلحق حِداشر آخ.. كُلْهم كْلّهم
ماتسيبش سيرتك تحت رحمة ريحة الدم ف قميص
وان كان يا إبليس الغرور أخدك
ورفضت تسجد للي خلقه الرب من صلصال وطين
لو كان فيه دعوة هتتقبل في الوقت دا.. خليك ذكي
أحسن لك اطلب مغفرة
إيه فايدة انك تتكتب في "المُنظَرين"؟

.
قُصر الكلام
لو كنت شاطر في شيء
ماتعلّموش غيرك
خدمة قديمة لصديق
هتغطي تقصيرك
وان كنت فعلا بريء
إحمي شرف بيرك
لو ناوي على شيء جريء
جهِّز له تبريرك
.
يا شيالين الهم.. يا تُعسا
الكون بيبدأ تاني ودي فرصة
ناخد حقوقنا من غباء النفس
نلعب على المضمون وننسى الرقص
الدنيا شركة ذات نظام صارم
يا تعيش مسالم.. أو تعيش سالم

.

يمكن ماكنتش كدا
بس التّشوُّه حصل
فات اللي فات وانقضى
تاه الغريب أو وصل
الحلو في الأمر إنه
إكمنه ضاع اللي منُّه
قرر يرتب كون جديد قوانينه تانية
ويكنسل الشخص القديم ويبدأ من ورا
إنسان مؤقَّت روحُه –زي التجربة- فانية
تنفع في كون قايم على البيع والشِّرا
أو يبقى شخص بيبتدي دنيا
كل امّا يحجز تذكَرة