في رأس كل فتاة سؤال يحرجها ويتسبب في إهانتها، وتحرص دائمًا أن تكون بعيدة عن ذلك السؤال، الذي غالبًا ما يكون عن حياتها الشخصية، وتقوم للخروج من مأزق إجابته بإبتكار عدد من الردود التي تضع الفتيات أمام البعض في طائلة قلة الذوق.

"المواطن" تواصلت مع عدد من الفتيات، وعرضت عليهن سؤال، "إيه أكتر سؤال محرج بتتسأليه"؟، لنسمع إجابتهن لوضع قائمة بأكثر أسئلة محرجة تتعرض لها الفتيات.


وزنك كام كيلو؟
روت سمية محمود، حكايتها مع الأسئلة المحرجة، فقالت: طبيعة الشعب المصري تسببت في أن كتير من الناس بتتدخل في حياة الآخرين بشكل مبالغ فيه بأسئلة مستفزة، يعني أنا أكتر سؤال محرج وجه لي كان وزنك كام كيلو، السؤال غريب جدًا ويعتبر تدخل غريب في خصوصيتي، وردي وقتها على أي حد بيسأله إني ببقى قليلة الذوق وأقول أنت مالك".

أنتي قصيرة كدة ليه؟
وقالت سمر ابراهيم: "أكتر سؤال محرج اتسئلته كان إنتي قصيرة كدة ليه، لأني قصيرة، السؤال محرج وبعتبره عيب في شكلي، فوقتها كنت إما مش برد أو أقول ضغطوني وأنا بتولد فقصرت، أو حد داس عليا، أي رد ساخر علشان أداري فيه إحراجي".

هنفرح بيكي أمتى؟
وقالت نرمين محمد: أن الأسئلة التي تتعرض لها الفتيات في بعض الأحيان تتسبب في دخولها في اكتئاب، ففي حالتي تأخر زواجي، كنت في البداية لا أبالي ذلك ولكن مع الوقت ومع تكرار سؤال عن سبب تأخر زواجي، تحول السؤال لعبئ كبير، وتحول لشبح مرعب أهرب من التعاملات مع الناس بسببه".

انتي كل ده لسه مخلفتيش؟
فيما روت ناهد أحمد، حكايتها مع السؤال الذي حول حياتها لكابوس كبير بعد زواجها، وهو سؤال ليه مخلفتيش لحد دلوقتي، فقالت: أنا ربنا مرزقنيش بالأطفال بقالي 6 سنين متجوزة، وربنا مش رايد يكون عندي أطفال، وكل ما حد يشوفني يسألني عن السبب، السؤال الأول كان محرج بعد كده السؤال بقا أكتر سؤال متعب، بيحولني لكائن غريب انطوائي دموعي على طول بتسبق أي رد ممكن أرده، ناس كتير مش بيكون قصدهم غير إنهم يطمنوا عليا بس فعلًا السؤال ده وحش أوي.

عندك كام سنة؟
وقالت فريدة أحمد: أكتر سؤال محرج ومعروف أن السيدات والفتيات بيتضايقوا ويتحرجوا منه، هو سؤال عندك كام سنة، وبجد يعتبر تطفل، لأن معروف أن الأنثى مش بتحب تظهر سنها كبير، علشان كده قلة الذوق خير رد على سؤال زي ده، لا سيما وإن اللي بيسأله قصده إنه يحرج اللي قدامه.

هو ده لون عنيكي؟
وعبرت نادين فؤاد، عن استيائها من الأسئلة المحرجة التي تتعرض لها الفتيات، فقالت: أسئلة كثيرة تتعرض لها الفتيات، هتتجوزي امتي وخلفتي ولا لسه، انتي رفيعة كده ليه وغيره، بس أغرب سؤال أتسئلته كان عن لون عنيا، أنا عيني فيها مرض مخليني في عين مفيش نيني، وبجد السؤال بالطريقة دي محرج جدًا.