عم علي ذلك الرجل العجوز ذو الشعر الأبيض، «مكوجي» بشارع روض الفرج، كان لديه محل يكتسب منه الرزق، إلا أن اضطر لغلق المكان بسبب الضرائب.

قصَ عم علي حكايته لـ بوابة المواطن الإخبارية بنبرة مليئة بالحسرة قائلاً:« أنا شغال في المهنة دي من وأنا عندي 13 سنة، وارثها من أبويا و الضرائب حجزت على المحل، وصاحب البيت أخده كان عليه 20 ألف من سنة 1988، سيبته وجيبت ترابيزة وناس ساعدتني بعد كدة قلوا بأصلهم فضلوا يقولولي امشي من هنا».

واستكمل قصته:«فيه ناس ولاد حلال كتير بتساعدني بس مش كله، الناس عايزة تكوي ببلاش يا اما موقفش هنا، وفي يوم مجتش كنت تعبان لقيت المكواة والتراببزة اتسرقت، دي تالت ترابيزة ومكواة الناس يشتروها ليا، وعندي عيال مش بيشتغلوا، بيشتغلوا يومين ويقولوا المصنع قفل وبنتي ضيعت كل فلوسي عليها وجوزتها لما كان معايا فلوس». 

وعن الجانب الإنساني في تلك الحكاية السوداوية تابع:«فيه ناس طيبين مقعدني انا وابني في اوضة من غير ما ياخدوا مقابل، وكل اللي أنا عايزه معاش حتى لو كان 300 جنيه».